«Ամեն օր զանգեք մամուլի ներկայացուցիչներին, ինձ, պատգամավորներին, ստեղ ո՞նց եք ապրում, ո՞նց եք հանդուրժում»,- այսօր քարոզարշավի շրջանակում Նոր Նորք վարչական շրջան այցելած քաղաքապետի թեկնածու Նիկոլ Փաշինյանը հարցնում էր բնակիչներին:
Հիշեցնենք, որ այս վարչական շրջանի մի շարք բակերում աղբն այնքան էր կուտակվել, որ դուրս էր թափվել աղբարկղերից ու ոտքի հետ գնում էր:
«Աղբը թափած է, ոստիկանություն, 911 զանգեք, մի հարմարվեք վիճակին, չի կարելի հարմարվել վիճակին»,- հորդորեց Փաշինյանը:
Նա բնակիչների հետ զրույցում ասաց՝ ընտրությունից հետո էլ նույնը պետք է լինի. «Քաղաքի կառավարմանը պետք է մասնակցեք, դա է օրենքի տրամաբանությունը, սա համայնք է, ու յուրաքանչյուր մասնակից պետք է մասնակցի համայնքի կառավարմանն իր մասով»:
Կարդացեք նաև
Հետո ցույց տալով աղբը՝ նկատեց՝ օրը հազար մարդ էս փողոցով անցնում է, ու համարում է, որ դա իր անելիքը չէ. «Այդ նույն մարդը ընտրակաշառք է վերցնելու, գնալու է ընտրության՝ համարելով, որ իշխանությունն ընտրելն էլ իր անելիքը չէ: Հետո մեզ փողոցում տեսնի ու թափ տա՝ բա մեր զիբիլը չեք տանում. գտեք մեզ, օգնեք ձեզ, սա է մեր ուղերձը ժողովուրդ ջան»:
Այլ քաղաքացիների հետ զրույցի ժամանակ էլ քաղաքապետի թեկնածուն անդրադարձավ ընտրակաշառքին, ասաց՝ ժողովուրդ ջան ինչքան ձեր ձեռքը պարզեք, այնքան պարզած է մնալու, նա խոստացավ նաեւ, որ իրենց տրված ձայները ոչ մեկ չի կարող վերցնել, իրենք նույնիսկ պատրաստ են զոհվել այդ ձայների համար, եթե մեկը փորձի գողանալ. «Տասը հազար դրամը ձեր խնդիրը չի լուծում, ձեր երեխեքի մասին պետք է մտածեք»:
Արփինե ՍԻՄՈՆՅԱՆ
