Ռուս նկարիչ Պյոտր Պավելենսկին քաղաքական ապաստան է ստացել Ֆրանսիայում: Այս մասին ՌԲԿ-ին ասել է նկարչի ընկերուհին՝ Օքսանա Շալիգինան՝ մանրամասնելով, որ քաղաքական ապաստան ստացել են ինքը, Պավլենսկին և իրենց երկու դուստրերը:
Հիշեցնենք, ավելի վաղ հաղորդվում էր, որ Պավլենսկին լքել է Ռուսաստանը և պատրաստվում է քաղաքական ապաստան խնդրել Ֆրանսիայից: Ռուսաստանում նրա դեմ քրեական գործ էր հարուցված ՌԴ ՔՕ 132-րդ («Սեռական բնույթի բռնի գործողություններ») հոդվածով:
Պավլենսկուն նշանավոր դարձրեց «Pussy Riot» պանկ-խմբին աջակցող ակցիան։ 2012 թվականի հուլիսի 23-ին նկարիչը թելով կարված բերանով պիկետի էր կանգնած Կազանսկի տաճարի մոտ՝ ձեռքին պաստառ։ Արվեստագետի խոսքով՝ ինքն այդ ժամանակ ցանկանում էր ցույց տալ ժամանակակից նկարչի վիճակը Ռուսաստանում` ազատ խոսքի արգելքը:
2015 թ. նոյեմբերի 9-ի գիշերը Պավլենսկին բենզին լցրեց և այրեց Լուբյանկայում ՌԴ Անվտանգության դաշնային ծառայության գլխավոր դուռը։ Երեսուն վայրկյան անց նա ձերբակալվեց։ Ըստ Պավլենսկու՝ «Լուբյանկայի այրվող դուռը ձեռնոց է, որը հասարակությունը նետում է ահաբեկչական վտանգին»:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
