Լրահոս
Օրվա լրահոսը

Ծարավ Աղբյուր և Զաքարիա Քանաքեռցի փողոցների բնակիչներն անհանգստացած են կանաչ այգու ճակատագրով

Մայիս 05,2017 13:34

«Ելք» դաշինքի թեկնածուները ահազանգ են ստացել Ծարավ Աղբյուր և Զաքարիա Քանաքեռցի (Սարկավագի) փողոցների խաչմերուկում գտնվող շենքերի բնակիչներից այն մասին, որ մերձակա տարածքում գտնվող այգին, որը տարիներ շարունակ խնամել են իրենք, 2007-ին վաճառվել է, հետագայում էլ՝ վերավաճառվել:

Ես՝ որպես «Ելք» դաշինքի ավագանու անդամի թեկնածու, ավագանու «Բարև Երևան» խմբակցության անդամ, նամակով դիմել եմ քաղաքապետ Տարոն Մարգարյանին.

«Նախընտրական այս եռուն օրերին, երբ Դուք հրապարակավ հայտարարում եք, թե որքան է բարեկարգվել Երևանը, որքան կանաչ տարածքներ են ավելացել և Ձեր իշխանության օրոք որքան երջանիկ են երևանցիները, ստանում եմ ճիշտ հակառակի մասին գրված հերթական մի նամակ:

Ծարավ Աղբյուր և Զաքարիա Քանաքեռցի (Սարկավագի) փողոցների խաչմերուկում գտնվող շենքերի բնակիչներից չափազանց մտահոգ մի նամակ եմ ստացել այն մասին, որ իրենց շենքի մոտ տասնամյակներ շարունակ գոյություն ունեցող 500 քմ կանաչ տարածքը, որն իրենց ջանքերով վեր է ածվել գեղեցիկ այգու, դեռևս 2007-ին ոմն Վլադիմիր Մելքոնյան գնել է աճուրդով, հետագայում էլ վերավաճառել է: Քաղաքացիների մոտ այն ժամանակ բազմաթիվ հարցեր են ծագել, նրանք դիմել են թե՛ Երվանդ Զախարյանին, թե՛ Ձեզ, սակայն պատասխան մինչ օրս չեն ստացել: Ակնհայտ է ապօրինությունների շղթան, որի մեջ շրջանառվում է այսօրվա Ձեր խորհրդական, նախկինում՝ Քանաքեռ Զեյթուն համայնքի ղեկավար Արայիկ Քոթանջյանի անունը, ով, ի դեպ, թաղապետ եղած ժամանակ վստահեցրել է բնակիչներին, որ նմանատիպ մոտ երկու տասնյակ աճուրդներ են եղել, որոնք քաղաքացիների բողոքների հիման վրա վերանայվելու են, և որոշում է կայացվելու վիճելի աճուրդներում «հաղթողներին» հողատարածքներ հատկացնել այլ վայրերում: Բնականաբար չի կատարվել նրա խոստումը: Կարծում եմ՝ այս խնդիրը լուծելու պատեհ պահն է:

Խնդրում եմ պատասխանել հետևյալ հարցերին և տրամադրել այդ տարածքի կարգավիճակի մասին փաստաթղթերի կամ սեփականության վկայականի պատճենները.

1. ինչու՞ է աճուրդի հանվել հանրային սեփականություն համարվող պուրակի տարածքը,
2.ինչո՞ւ է այն ներկայացվել որպես անտեր ու անմշակ մի տարածք (հիշո՞ւմ եք, Տիգրան Պետրոսյանի վրայի կանաչ գազոնն էլ էին Ձեզ ներկայացրել որպես անբարեկարգ տարածք),
3. ինչու՞ շենքի բնակիչները, լինելով այդ տարածքի անմիջական օգտագործողները, ունենալով այնտեղ տնկած տասնյակ ծառեր, ընդհանրապես չեն իրազեկվել այդ «աճուրդ» կոչվածի մասին այն դեպքում, երբ ըստ ՀՀ Հողային օրենսգրքի 72 հոդվածի 2-րդ կետի, նրանք ունեին այդ տարածքից սեփականության իրավունքով հողամասեր ձեռք բերելու նախապատվության իրավունք, որից չեն հրաժարվել»:

Անահիտ Բախշյան
Երևանի ավագանու
«Բարև Երևան» խմբակցության անդամ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մայիս 2017
Երկ Երե Չոր Հնգ Ուրբ Շաբ Կիր
« Ապր   Հուն »
1234567
891011121314
15161718192021
22232425262728
293031