Գյումրիում Ավետիսյանների ընտանիքին դաժանաբար սպանած Վալերի Պերմյակովի արտահանձնման որոշում չկա:
Այս մասին Aravot.am-ին ասաց գործով տուժողների իրավահաջորդի ներկայացուցիչ Երվանդ Վարոսյանը:
«Ինչ վերաբերում է կոնկրետ անձին՝ նա չի հանձնվում ՌԴ-ին մի պարզ պատճառով, որ նա երբեք ՀՀ իրավազորության տակ չի էլ գտնվել, որ ՀՀ-ն կարողանա այդ հարցը որոշել:
Այստեղ խնդիրը ծագել է առաջին իսկ օրը, այսինքն՝ ոճրագործության հաջորդ օրը, երբ Պերմյակովը ձերբակալվեց ռուս սահմանապահների կողմից ու հայտնվեց Ռուսաստանի իրավազորության ներքո, առաջացավ այս խնդիրը, իսկ այս խնդիրը չստեղծելու համար հայ իրավապահները պետք է պատշաճ գործեին ու պետք է նա ձերբակալվեր ՀՀ ոստիկանության կողմից, արդյունքում ստացվեց մի իրավիճակ, որ ՌԴ քաղաքացին հայտնվեց ՌԴ իրավազորության ներքո, այդ պահից այս հարցը լուծված էր: Չնայած տուժող կողմի համար դա ընդունելի չէ, բայց փաստը մնում է փաստ, որ դա առաջին օրվանից լուծված հարց էր»,- ասաց պարոն Վարոսյանը:
Կարդացեք նաև
Ավետիսյանների հարազատների մտավախությանը, թե Պերմյակովը ՌԴ գնալով հնարավոր է՝ պատիժն էլ չկրի, պարոն Վարոսյանն ասաց՝ նման մտավախություն չունի, քանի որ այնպիսի ոճիրի հետ գործ ունենք, որ անկախ նրանից, թե ՌԴ-ն ինչքանով է իրավական կամ ոչ իրավական պետություն, նման ոճրագործին ազատ չի արձակի:
Երվանդ Վարոսյանը հիշեցրեց, որ քրեական գործով ձեռք չէր բերվել որեւէ փաստական հանգամանք, որը հիմք կտար ենթադրելու, որ հնարավոր է՝ Պերմյակովն ունեցել է հանցակից: Ավելին՝ կան փաստական հանգամանքներ, որ նման հնարավորությունը գրեթե բացառում է. «Ինչ վերաբերում է կատարելու դրդապատճառներին, շորերը Ավետիսյանների ընտանիքում թողնելուն, առհասարակ այդ անձին, ապա այդ ամենի պատասխանը քրեական գործը պարունակում է՝ գործ ունենք հոգեպես անհավասարակշիռ անձի հետ, որից ամեն ինչ սպասելի է, այս է պատճառը, որ տուժող կողմը փորձում է պատասխանատվության կանչել նաեւ ՌԴ-ին՝ որպես պետություն գոնե գույքային մասով: Քանի որ ՌԴ Զինված ուժերի պաշտոնյաները նրա հոգեկան վիճակի մասին տեղեկություններ ունեցել են նույնիսկ նախքան նրան ՀՀ տեղափոխելը, ՌԴ-ն չի կարող որպես պետություն պատասխանատվություն չկրել: Ցավոք, ՀՀ դատարանները վարույթ չընդունեցին ՌԴ դեմ մեր կողմից ներկայացված քաղաքացիական հայցը, այս առումով Վճռաբեկ դատարանը վերջնական որոշում է կայացրել, եւ այժմ մեր կողմից գանգատ է պատրաստվում ՄԻԵԴ»:
Արփինե ՍԻՄՈՆՅԱՆ
