«Յուքոմ» ընկերությունը 2016թ. ցանկացել է Բագրատաշենի գյուղապետարանի բակում ալեհավաք կառուցել: Բագրատաշեն համայնքի ավագանու անդամները պատրաստակամություն են հայտնել ալեհավաքի համար տարածքը «Յուքոմին» վարձակալությամբ տալու կամ աճուրդով վաճառել: «Յուքոմ» ընկերությունը հայտնել է, որ չի ցանկանում տարածքը վարձակալել, կամենում է այն գնել:
2016թ. հունիսի 20-ին Բագրատաշեն համայնքի ավագանին որոշում է ընդունել ալեհավաքի համար նախատեսված 90 քառակուսի մետր տարածքը աճուրդով վաճառել, այդ տարածքի վաճառքի մեկնարկային գին սահմանելով 1 միլիոն դրամը: «Յուքոմ» ընկերությունում համարել են, որ նշված տարածքի համար 1 միլիոն դրամը մեծ գումար է եւ հրաժարվել են այն գնել: Չնայած դրան, այդ ընկերությունը Բագրատաշենի գյուղապետարանի բակում 35 մետր բարձրությամբ ալեհավաք է կառուցել:
Բագրատաշենի վարչական ղեկավար Արկադի Մակյանից տեղեկացանք, որ 2 ամիս առաջ «Յուքոմի» ալեհավաքին էլեկտրական հոսանք է միացվել, ալեհավաքը գործում է: 2016թ. սեպտեմբերից 18-ին կայացել են խոշորացված Այրում համայնքի ղեկավարի եւ ավագանու ընտրություններ, Բագրատաշեն գյուղն ընդգրկվել է Այրում համայնքի կազմում: Արկադի Մակյանն ասաց, որ մոտ 10 օր առաջ «Յուքոմի» ներկայացուցիչը հանդիպել է խոշորացված Այրում համայնքի ղեկավար Արայիկ Պարանյանի հետ: Այդ հանդիպման ժամանակ պայմանավորվածություն է ձեռք բերվել, որպեսզի այդ ընկերությունը վարձակալի ալեհավաքի տարածքը:
Բագրատաշենի վարչական ղեկավարն ասաց, որ «Յուքոմը» ցանկանում է այդ տարածքը ցածր գնով վարձակալել, սակայն իրենք դրան դեմ են:
Կարդացեք նաև
Տավուշի մարզի ընդհանուր իրավասության առաջին ատյանի դատարանում ներկայումս բազմաթիվ քաղաքացիական գործեր են քննվում, որոնց հայցվորը «Յուքոմն» է, հայցերը վերաբերում են ֆիզիկական անձանցից գումարների բռնագանձմանը: 2016թ. մարտի 31-ին «Օրանժ Արմենիա« ՓԲԸ-ն վերակազմակերպվել, միացել է «Յուքոմ» ՍՊԸ-ին; «Օրանժի» մատուցած ծառայությունների դիմաց գումարները գանձելու նպատակով «Յուքոմը» դատի է տվել սահմանամերձ Տավուշի բազմաթիվ բնակիչների:
Ոսկան ՍԱՐԳՍՅԱՆ
