Արցախի հանրապետության տնտեսության համար նախորդ տարին առանձնացավ, թերևս, գյուղատնտնեսության ոլորտում շոշափելի հաջողությամբ. գրանցվեց հացահատիկայինների աննախադեպ բերքահավաք. ավելի քան 150 հազար տոննա արդյունքը ռեկորդային էր, ինչին նաև մեծապես նպաստեց հակահրդեհային աշխատանքների ճիշտ և ժամանակին կազմակերպումը: Այդ նպատակի համար գյուղատնտեսության նախարարությունը ձեռք է բերում և տրամադրում իր ենթակայությամբ գործող «Բույսերի պաշտպանության ծառայություն» ՊՈԱԿ–ին անհրաժեշտ հերբիցիդները՝ նպատակ ունենալով կանխել բերքահավաքի շրջանում հնարավոր հրդեհների առաջացումը:
Այս տարի ևս աշխատանքները կազմակերպվել են հավուր պատշաճի, և բերքահավաքին ընդառաջ մոլախոտային բուսականության դեմ պայքարի աշխատանքներն արդեն մոտենում են իրենց ավարտին: Ինչպես նշեց ԲՊԾ տնօրեն Վալերի Խաչատրյանը, աշխատանքներն իրականացվել են հանրապետության ողջ տարածքում՝ շուրջ 1500 հա-ի վրա:
-Առանձնակի ուշադրություն է դարձվել հարթավայրային սահմանամերձ գոտուն, որտեղ կենտրոնացված է ցանքատարածությունների մեծ մասը և մշտապես առկա է մասսայական բռնկման վտանգը: Համապատասխան կառույցների հետ համագործակցությամբ, նմանատիպ աշխատանքներ են իրականացվել նաև շփման գծի ողջ երկայնքով, որտեղ հակառակորդի կողմից ավանդաբար արվում են հրդեհներ կազմակերպելու փորձեր: Նշեմ նաև, որ հետագայում աշխատանքներն ավելի արդյունավետ կազմակերպելու համար նախարար Արամ Մխոյանի հետ քննարկել ենք մեր ծառայությունը տեխնիկապես վերազինելու հեռանկարը, և, ամենայն հավանականությամբ, առաջիկայում կհամալրվի մեր տեխնիկական զինանոցը,- ասաց Վ. Խաչատրյանը:
Կարեն Միրզոյան
Կարդացեք նաև
Արցախ