Փոստանջյանը մեղադրում է Փաշինյանին, մինչդեռ վերջինս չի բացառում «Երկիր ծիրանիի» հետ գործակցությունը

Երեւանի ավագանու ընտրություններին մասնակցող «ԵԼՔ» դաշինքի եւ «Երկիր Ծիրանի» կուսակցությունների քարոզարշավն այսօր աչքի ընկավ մեղադրանքներով եւ արդարացումներով:

Ժամեր առաջ Նիկոլ Փաշինյանը «ԵԼՔ»-ի՝ ընտրակաշառքից հրաժարվածներին 15 000 դրամ տրամադրելու ծրագրի առնչությամբ ասաց. «Հանցանքն արձանագրելու ժամանակ օրինապահ քաղաքացին դիմում է իրավապահ համակարգին»:

Սրան հաջորդել էր կրկին այսօր «Երկիր Ծիրանի» կուսակցության առաջնորդ Զարուհի Փոստանջյանի հետեւյալ հայտարարությունը. «Փաշինյանի հայտարարությունը(նկատի ունի 15 000-ի պատմությունը.-խմբ) պարունակում է քրեորեն պատժելի արարք և իրավապահ մարմինները պետք է զբաղվեն դրանով»:

Զարուհի Փոստանջյանը դատապարտեց «ԵԼՔ»-ի նշյալ նախագիծը՝ համոզմունք հայտնելով, որ այն կրկնում է արատավոր իշխանության գործունեությունը: Ապա` Փոստանջյանն անդրադարձավ հենց Նիկոլ Փաշինյանին. «Նա կողմ է քվեարկել 1000 դրամների նախագծին, նա դեմ է քվեարկել իմ նախագծերին: Նա ապրիլի 2–ի խայտառակ ընտրությունները ճանաչել է լեգիտիմ»:

Այսօր Նիկոլ Փաշինյանն, այնուամենայնիվ, չբացառեց Զարուհի Փոստանջյանի հետ գործակցությունը. «Բացառում եմ, որ համագործակցություն տեղի չունենա մեր դիրքորոշումների պատճառով, հանուն Երեւանի պատրաստ ենք համագործակցել «Երկիր Ծիրանիի» հետ: Ամենաբարձր մակարդակի առաջարկներ ենք արել Զարուհի Փոստանջյանին համագործակցության»:

Այստեղ նկատենք, որ խոսքը մինչեւ ավագանու ընտրությունների քարոզարշավը Զարուհի Փոստանջյանին արված «ԵԼՔ»-ի հետ գործակցելու առաջարկների մասին է: Փոստանջյանը, սակայն, վերջերս պնդել էր, որ իրեն «ԵԼՔ»-ից պաշտոնական առաջարկ չի արվել:

Թեեւ գործակցության վերջին առաջարկին «Երկիր Ծիրանիի» կողմից արձագանք չկա, դժվար է պատկերացնել, որ Զարուհի Փոստանջյանը կցանկանա գործակցել մի ուժի հետ, որին արհեստածին է որակում, իսկ Նիկոլ Փաշինյանին՝ մեղադրում նախագահ Սերժ Սարգսյանի հետ  գործակցելու մեջ:

Մանրամասն՝ տեսանյութում:

Պատրաստեց Լուիզա ՍՈՒՔԻԱՍՅԱՆԸ