Քաղաքագետ, Ռազմավարական եւ ազգային հետազոտությունների հայկական կենտրոնի տնօրեն Մանվել Սարգսյանը կարծում է, որ նոր խորհրդարանի գոյությունը Հայաստանի քաղաքական կյանքում ոչինչ չի փոխելու, ի հեճուկս իշխանությունների այն հայտարարությունների, թե ապրիլի 2-ին ընտրություններում ձեւավորված խորհրդարանը լրջագույն դերակատարում ունի: Ֆորմալ առումով, իհարկե, իշխանությունը ճիշտ է: Այս խորհրդարանն իր ուսերին պետք է կրի Հայաստանի կառավարման նոր համակարգի ողջ բեռը: Բայց իրականում, սկզբունքային առումով, մեր կյանքում ոչինչ էլ չի փոխվելու`որոշողը նույն ՀՀԿ-ն է, իր արբանյակներով:
Արբանյակների թվին, քաղաքագետը դասում է նաեւ «Ծառուկյան» դաշինքը, որը «կխաղա» ընդդիմադիր դաշտում: Ինչ վերաբերվում է խորհրդարանում հիմնական ընդդիմադիր ուժ համարվող «Ելք»-ին, մեր զրուցակիցն ասում է. «Ելք»-ը ձայներ չունի: Սրանով ամեն ինչ ավարտվում է»:
Պատասխանելով «Ծառուկյան» դաշինքում ընթացող մանդատակռվի մասին մեր հարցին, մասնավորաբար, արձագանքելով դիտարկմանն, արդյոք այն ինչ կատարվեց, Գագիկ Ծառուկյանին կրկին, այսպես ասած, ոչնչացնելո՞ւ համար էր, Մանվել Սարգսյանն ասաց. «Գագիկ Ծառուկյանին պետք չի ոչնչացնել: Գագիկ Ծառուկյանն արհեստական ստեղծված բեւեռ է`քաղաքական ամբողջ դաշտը վերահսկելու համար: Հենց 2006 թվականից նա դրա համար էր: Մարդկանց թվում էր, թե նա իրականում ինչ-որ գործոն է, չգիտեմ ինչ է: Իրականության մեջ այդպիսի բան չկա: Այս համակարգը, որը կոչվում է քաղաքական ճորտատիրություն, չի տարբերում մարդկանց. Մարդը, որին ստիպում են տասը հազար դրամ վերցնի ու գնա քվեարկի կամ չվերցնի ու քվեարկի, մինչեւ Գագիկ Ծառուկյան, նույն վիճակում են հայտնվում»:
Վարչապետ Կարեն Կարապետյանի խոստացած բարեփոխումների եւ այլ հարցերի շուրջ մանրամասները` տեսանյութում
Նելլի ԳՐԻԳՈՐՅԱՆ
