Կառավարությունը որոշում կընդունի ՀՀ Զինված ուժերի համար ռազմական նշանակության արտադրանքի ներմուծումն ավելացված արժեքի հարկից ազատելու մասին: Այս մասին տեղեկանում ենք կառավարության մայիսի 18-ի նիստի օրակարգից:
Որոշման նախագծում գրված է՝ «Հավանություն տալ «Հայաստանի Հանրապետության եւ Ռուսաստանի Դաշնության միջեւ միջպետական (միջկառավարական) համաձայնագրերի շրջանակներում ՀՀ զինված ուժերի համար բացառապես ռազմական նշանակության արտադրանքի ներմուծումն ավելացված արժեքի հարկից ազատելու մասին» Հայաստանի Հանրապետության օրենքի նախագծին եւ այն սահմանված կարգով ներկայացնել Հայաստանի Հանրապետության Ազգային ժողով»:
Որոշման նախագծում նշված է, որ ՀՀ կառավարության եւ ՌԴ կառավարության միջեւ ՀՀ կառավարությանը պետական արտահանման վարկ տրամադրելու մասին» համաձայնագրով, ինչպես նաեւ նմանատիպ՝ ՀՀ եւ ՌԴ միջեւ միջպետական (միջկառավարական) համաձայնագրերի շրջանակներում Հայաստանի զինված ուժերի համար ռազմական նշանակության արտադրանքի ներմուծման նկատմամբ ավելացված արժեքի գծով արտոնություններ սահմանված չեն: Ուստի պաշտպանության նախարարն առաջարկում է նշված ապրանքների ներմուծումն ազատել ԱԱՀ-ից:
Նաեւ առաջարկվել է՝ «Նախագծում հստակեցնել արտոնության շահառուներին` Հայաստանի Հանրապետությունում ռուսաստանյան ռազմակայան, Հայաստանի Հանրապետության զինված ուժեր, Հայաստանի Հանրապետությունում տեղի ունեցող զորավարժություններ»:
Ինչպես նաեւ առաջարկվել է նախագծով նախատեսվող ԱԱՀ-ից ազատման արտոնությունը փոխարինել համաֆինանսավորման մեխանիզմներով: Սակայն պետական եկամուտների կոմիտեն այս առաջարկը մերժել է, հիմնավորելով՝ «Հաշվի առնելով ռազմական նշանակության արտադրանքի ներմուծման ծավալները և պարբերականության անկանխատեսելիությունը` համաֆինանսավորման մեխանիզմների կիրառումը գտնում ենք ոչ նպատակահարմար»:
Նելլի ԲԱԲԱՅԱՆ
