«Ես այսօր շրջում էի Ազգային ժողովի շենքում եւ այն բացարձակապես հարմարեցված չէ հաշմանդամություն ունեցող մարդկանց»,- «Ելք» դաշինքի երիտասարդ պատգամավոր Գեւորգ Գորգիսյանն այսօր ԱԺ-ում այսպես ԱԺ առողջապահության, մայրության, սոցիալական հարցերի հանձնաժողովի նախագահի պաշտոնում ՀՀԿ-ի կողմից առաջադրված Հակոբ Հակոբյանին հարցրեց՝ ի՞նչ է պատրաստվում անել այդ ուղղությամբ՝ լինելով համապատասխան հանձնաժողովի նախագահ:
Հակոբ Հակոբյանը պատասխանեց. «Այո, ցավոք, այդպես է»:
Գորգիսյանը նաեւ հարցրեց՝ գրեթե բոլոր պոլիկլինիկաներում ունենք խնդիրներ հագեցվածության, ջեռուցման, մասնագետների պակասի, որոշ քայլեր նախատեսո՞ւմ եք անել:
Հակոբ Հակոբյանը պատասխանեց, որ դա կախված է բյուջեի հնարավորություններից:
Արտակ Զեյնալյանն էլ հարցրեց. «Միգրացիայի բարձրաստիճան պաշտոնատար անձը հայտարարեց, որ ՀՀ-ից արտագաղթի պատճառներից մեկն էլ հուսալքությունն է կամ հեռանկարի բացակայությունը, կիսո՞ւմ եք այդ տեսակետը, թե՞ ոչ»:
Հակոբ Հակոբյանը պատասխանեց, որ մարդիկ աշխատանքի ակնկալիք ՀՀ-ում չեն տեսնում, դրա համար էլ գնում են դուրս՝ աշխատելու. «Երկրորդը՝ իրավական, հոգեբանական խնդիրներ ունեն մարդիկ, սոցիալական խնդիրներ ունեն»:
Հռիփսիմե ՋԵԲԵՋՅԱՆ
