Մայիսի 19-ին Երևանի պետական համալսարանի Չարենցի անվան դահլիճը սովորականից ավելի հերոսաշատ էր: Ժուռնալիստիկայի ֆակուլտետի 3-րդ կուրսի ուսանողուհի Լիլիթ Հարությունյանը ներկայացրեց իր նկարահանած առաջին վավերագրական ֆիլմը: Այն նվիրված էր ապրիլյան մարտերում զոհված, «Մարտական խաչ» առաջին աստիճանի շքանշանակիր, ավագ լեյտենանտ, տանկի հրամանատար Բենիամին Մոնթե Եղոյանի հիշատակին: Հերոսը մայիսի 19-ին կդառնար 25 տարեկան:
Սկզբում ներկայացվեց մոտ 3 րոպեանոց տեսանյութ, որտեղ ապրիլյան մարտերում զոհված մեր հերոսներն էին: Լիլիթը նշեց, որ բոլոր հերոսներին հիշելը Մոնթեի մոր՝ Հռիփսիմե Եղոյանի խնդրանքն է եղել: Ֆիլմի պրեմիերային ներկա էին հերոսի ընկերները, զինվորները, ընտանիքն ու Ապրիլյան պատերազմում զոհված մեր մյուս հերոսներ Ռոբերտ Աբաջյանի պապիկն ու Ադամ Սահակյանի մայրիկը: Իրենց ներկայությամբ պատվել էին նաև քառօրյա պատերազմում մեր սահմանների պահապաններ Շուլի Հակոբյանն ու Հարություն Բադալյանը:
Մինչ ֆիլմի սկսվելը հանդիսատեսը պատիվ ունեցավ լսելու հերոս Մոնթեի սիրած երգերը: Ֆիլմը պատմում էր Մոնթեի ապրած կարճ, բայց բովանդակալից կյանքի մասին: Լիլիթ Հարությունյանն ասաց, որ նկարահանման ընթացքում շատ դժվարություններ են ունեցել, սակայն հաղթահարել են հանուն մեկ գաղափարի, հանուն հերոս Եղոյանի:
«Մոնթես շատ էր սիրում իր տանկը, հպարտ էր, որ կարողանում է իրեն ենթարկեցնել այդ հզոր տեխնիկան»,-ասաց Մոնթեի քույրը` Գայանե Եղոյանը:
Ֆիլմի ավարտին Լիլիթը խոստացավ, որ իր սկսած գործը շարունակական է լինելու, հաջորդ ֆիլմերը նվիրված են լինելու տանկում եղած մյուս երկու հերոսների` Տիգրան Աբգարյանի ու Վլադիմիր Ալիխանյանի հիշատակին:
Լիդիա ԿԱՐԱՊԵՏՅԱՆ
լուսանկարը՝ Միլենա ԽԱՉԻԿՅԱՆԻ
