ՊՆ պաշտպանական քաղաքականության վարչության պետ Լեւոն Այվազյանն այսօր «Սպուտնիկ Արմենիա» մամուլի սրահում հարցին՝ ՀԱՊԿ քարտուղարի տեղակալ Վալերի Սեմերիկովն ասել է, որ ՌԴ-ից ՀՀ-ին զենքի, ուղղաթիռների նոր խմբաքանակ է մատակարարվելու 2018-19-ին, ասել էր, ի՞նչ պայմաններով ենք ձեռք բերելու զենքի այդ խմբաքանակը՝ պատասխանեց. «Մենք ունենք տարբեր ծրագրեր, որոնցից մեկը միջպետական վարկի շրջանակներում ՀՀ ներկրվող սպառազինությունն ու ռազմական տեխնիկան է, որն իրականացվում է կանոնավոր ձեւով՝ ըստ մեր կողմից հաստատված ժամանակացույցերի: Որեւէ ուշացումներ չեն լինում, ընդհակառակը, որոշ զինատեսակների առումով նույնիսկ ժամետից ավելի շուտ է կատարվում: Երկրորդը՝ կրկին երկկողմ ձեւաչափով երկու պետությունների ՊՆ-ների միջեւ առկա ռազմատեխնիկական համագործակցությունն է, որը նույնպես ենթադրում է տարբեր սպառազինության տեսակների, ռազմամթերքի ներկրումներ, նաեւ իրենից ենթադրում է ռազմարդյունաբերական համալիրում երկու պետությունների ձեռնարկությունների միջեւ սերտ համագործակցություն, համատեղ ձեռնարկությունների ստեղծում, որոշ ռազմական նշանակության ապրանքների համատեղ արտադրում եւ այլն»:
Այվազյանն ասաց, որ ՌԴ-ից սպառազինությունը արտոնյալ պայմաններով ենք ձեռք բերում. «ՌԴ-ի հետ մենք ունենք հատուկ համաձայնագրեր, որոնք մեզ թույլ են տալիս ՌԴ-ի հետ ռազմատեխնիկական ոլորտում հատուկ պայմաններով համագործակցել: ՌԴ-ից կարողանում ենք դրանք ձեռք բերել ՌԴ-ի ներքին գներով, այն գները, որ գործում են ՌԴ-ի բանակի համար, նույն գները գործում են նաեւ մեզ համար: Դա իհարկե, յուրահատուկ արտոնություն է, որը կարողանում ենք մեր ռուս դաշնակցի հետ իրականացնել»:
Թե ինչ զինատեսակներ ենք բերում՝ Լեւոն Այվազյանն ասաց, որ ձեռնպահ կմնա նշել, ռազմական գաղտնիք է:
Հռիփսիմե ՋԵԲԵՋՅԱՆ
