«Ոչինչ նոր չէր ասվածում: Պարզ է, որ սեղանին «Մադրիդյան փաստաթուղթն» է, այլ փաստաթուղթ չկա»,-«Հենարան» մամուլի ակումբում այսօր, անդրադառնալով նորընտիր ԱԺ նիստում նախագահի ելույթին, ասաց քաղաքագետ Ալեքսանդր Իսկանդարյանը: Հիշեցնենք՝ Սերժ Սարգսյանը մասնավորապես ասել էր. «Հայաստանը բազմիցս է կողմ արտահայտվել փոխզիջման հիման վրա հանգուցալուծման գնալու օգտին, որի էությունը Արցախի ինքնորոշման իրավունքի ճանաչումն ու իրացումն է»:
«Դժվար է պատկերացնել., որ Ադրբեջանը կգնա ցավոտ փոխզիջումների… Հակամարտության իրավական կարգավորման հնարավորություններ չկան: ՀՀ-ն հիմա բանակցային գործընթացում գործընկեր չունի»,-նկատեց Ալեքսանդր Իսկանդարյանը:
Ինչ վերաբերում է սահմանային վերջին միջադեպի շուրջ Մինսկի խմբի հասցեական գնահատականին, փորձագետի խոսքով՝ այն Ադրբեջանի վրա ներազդելու փորձ է: Ալեքսանդր Իսկանդարյանը կարծում է, որ սահմանային լարվածությունը նաեւ Ադրբեջանում ներքաղաքական սրացումների հետեւանք է. «Նավթի գների անկումը, ֆինանսատնտեսական խնդիրներն Ադրբեջանի վերնախավում լուրջ խնդիրներ են առաջացնում՝ կլանային պայքար է ընթանում, զինվորականներ են ձերբակալվում»:
Այդուհանդերձ, քաղաքագետի բնորոշմամբ՝ ապրիլյան քառօրյայի պես սրացում չի լինի, բայց բացառել ընդմիշտ՝ չի կարելի. «Դա Ադրբեջանից մեծ պատրաստվածություն եւ փող է պահանջում»:
Ալեքսանդր Իսկանդարայնը չշրջանցեց նաեւ Ադրբեջանի արտգործնախարար Էլմար Մամեդյարովի վերջին հայտարարությունը, թե «զորքերի դուրսբերումը՝ խաղաղության փոխարեն, կամ տարածքներ՝ խաղաղության փոխարեն, հնարավոր է»: «Այսինքն, ուզում է ասել՝ տվեք մեզ ինչ-որ բան, որ չկրակենք ձեր վրա… դա դուրս է բանակցային գործընթացի տրամաբանությունից, հասկանո՞ւմ եք: Չի կարելի բանակցել ու միաժամանակ կրակել»,-նկատեց քաղաքագետը:
Թեմայի շուրջ այլ մանրամասները՝ տեսանյութում
Լուիզա ՍՈՒՔԻԱՍՅԱՆ
