«Մտահոգիչ է այդ փաստը, որն արդեն նախադեպ է դառնում: «Ժողովուրդների դեմոկրատական կուսակցության» վերնախավն արդեն իսկ կալանավորված է»,-Aravot.am-ի հետ զրույցում, անդրադառնալով Թուրքիայի քրդամետ «Ժողովուրդների դեմոկրատական կուսակցության» հայազցի պատգամավոր Կարո Փայլանին անձեռնմխելիությունից զրկելու Թուրքիայի արդարադատության նախարարության՝ օրերս ներկայացրած պահանջին, ասաց թուրքագետ Լեւոն Հովսեփյանը: Հիշեցնենք, որ դատական մարմնի պահանջն ուղղված է նաեւ Փայլանի մի շարք այլ կուսակիցների, նաեւ՝ «Ժողովրդահանրապետական» կուսակցության որոշ պատգամավորների դեմ:
Մեր զրուցակիցը չի բացառում, որ Թուրքիայի խորհրդարանն ընթացք կտա պատգամավորներին անձեռնմխելիությունից զրկելու պահանջին. «Ճիշտ է, այն չի վերաբերում միայն Կարո Փայլանին, թեեւ թիրախում առաջնահերթ հենց նա է՝ իր ակտիվ քայլերով: Հաշվի առնենք, որ նրա կուսակցությունը մասնատված է, ինչի համատեքստում Փայլանն ավելի մեծ դերակատարում ունի»:
Լեւոն Հովսեփյանի բնորոշմամբ՝ նման քաղաքական գործիչներն ու նրանց գործունեությունը ցանկալի չեն ներկայիս Թուրքիայի քաղաքական վերնախավի համար, որն ամեն կերպ փորձում է չեզոքացնել նրանց:
Լուիզա ՍՈՒՔԻԱՍՅԱՆ
