ԱԺ ՀՀԿ խմբակցության պատգամավոր Հայկ Բաբուխանյանի կարծիքով, վերջին խորհրդարանական ընտրություններին ժողովուրդը «Ազատ դեմոկրատներ» կուսակցությանն ուղարկեց քաղաքական աղբանոց:
Նա այսօր Aravot.am-ի հետ զրույցում ասաց, որ «Ազատ դեմոկրատներին» կառաջարկեր, որ բարձրացնեն իրենց կրթական ու բարոյական մակարդակը. «Վերանայեին իրենց աշխատաոճն ու ծրագրերը, որպեսզի եթե պատրաստվում են, այնուամենայնիվ, մնալ քաղաքական ասպարեզում, թեեւ կարծում եմ՝ դրանից հետո ավելորդ կլինի, այդ մնալը մյուս անգամ նույնպես չարժանանար ժողովրդի զրոյական գնահատականին ու արհամարհանքին»:
Ըստ մեր զրուցակցի. «Ազատ դեմոկրատներ» կոչվածը ժողովրդից իր գնահատականը ստացավ այս ընտրություններին: Այդ գնահատականը զրոյական գնահատականն է, կարծում եմ՝ դրանից հետո իրեն քիչ թե շատ հարգող քաղաքական ուժը պետք է վերանայեր իր կարծիքն իր իսկ մասին…Ժողովուրդը նրանց չգնահատեց, ժողովուրդը նրանց անտեսեց, նշեց, որ նրանք ընդհանրապես անպետք են ու ուղարկեց քաղաքական աղբանոց»:
Անդրադառնալով «Ազատ դեմոկրատների» նախկին փոխնախագահ Անուշ Սեդրակյանի գնահատականին, թե «Այժմ խորհրդարանում մնացել են հին՝ սովետական КГБ-ի ներկայացուցիչները, որոնք առերեւույթ այդքան էլ զվարճալի չեն, բայց իրականում կատարելու են իրենց սեւ գործը՝ լինի դա քվեարկություն, թե քարոզչություն: Այդ հին բանակը՝ Բաբուխանյանի, Գեղամյանի տեսքով, խորհրդարանի համար շատ ավելի վտանգավոր է, քան իրենց ոչ ադեկվատ հայտարարություններով հայտնի գործարարները»: Հայկ Բաբուխանյանն ասաց՝ կա մարդկանց կատեգորիա, որոնց կարծիքն իրեն բացարձակապես չի հետաքրքրում. «Հակառակ դեպքում կարելի էր այդ անձին զրպարտության համար պատասխանատվության ենթարկել»:
Արփինե ՍԻՄՈՆՅԱՆ
Մանրամասները շուտով՝ տեսանյութում
Անուշ Սեդրակյանը շատ ճիշտ գնահատական է տվել: Եթե ժողովուրդը ընտրելու լիներ, Բաբուխանյանը քաղաքական աղբանոցից ավելի վատ տեղում կհայտնվեր: