ԱԺ ՀՀԿ խմբակցության պատգամավոր Ռուզաննա Մուրադյանը կարծում է, որ դպրոցների օպտիմալացումը պետք է դրական ընկալել՝ համարելով այն արդյունավետացում:
Aravot.am-ի հարցին, թե մտավախություն չունե՞ք, որ գյուղական դպրոցների օպտիմալացումը կբերի գյուղերի դատարկմանը, արտագաղթի նոր պատճառ կդառնա, տիկին Մուրադյանը պատասխանեց. «Այս առաջարկի հետ կապված, ի սկզբանե պետք է սկսվեր քաղաքային դպրոցներից, ես էլ եմ այն կարծիքին, որ յուրաքանչյուր գյուղ պետք է ապրի իր դպրոցով»:
Օպտիմալացման վտանգի տակ են հատկապես այն դպրոցները, որտեղ աշակերտների ընդհանուր թիվը երեսունի կարգի է, տիկին Մուրադյանից հետաքրքրվեցինք՝ ընդունո՞ւմ է ՀՀԿ-ին ուղղված մեղադրանքները, թե այս ռեժիմի օրոք արտագաղթի ցուցանիշը կտրուկ աճել է ու այդ պատկերը երեւում է հենց դպրոցներում:
«Ամեն ինչ կարող ենք կապել արտագաղթի հետ, բայց վերջին տարիներին ծնելիության համար նպաստավոր պայմաններ են ստեղծվում…»,- պատասխանեց տիկին Մուրադյանը:
Մեր ճշտող հարցին՝ ինչո՞ւ են դատարկվել դպրոցները, ո՞ւր են աշակերտները, տիկին Մուրադյանը պատասխանեց. «Դպրոցները չեն դատարկվել, աշակերտների թիվը պակասել է, ժամանակի ընթացքում եղել է խնդիր…»:
Հիշեցնենք, որ վարչապետ Կարեն Կարապետյանը ԿԳ նախարարին հանձնարարեց` 15-օրյա ժամկետում կառավարության աշխատակազմին ներկայացնել դպրոցների օպտիմալացման վերաբերյալ առաջարկություններ:
Արփինե ՍԻՄՈՆՅԱՆ
Մանրամասները՝ տեսանյութում
