«Դատավորը չի կարողանում իր ծանրաբեռնվածությունը պլանավորել».

Քաղաքացիական ակտիվիստ Հակոբ Դեխնավիի գործով դատական նիստն այսօր կրկին տեղի չունեցավ Արաբկիր Քանաքեռ-Զեյթուն վարչական շրջանների ընդհանուր իրավասության դատարանում:

Հակոբ Դեխնավիի փաստաբան Դավիթ Գյուրջյանը դժգոհեց, որ նախագահող դատավորը` Մարինե Մելքոնյանը, չի կարողանում իր ծանրաբեռնվածությունը պլանավորել. «Դրա պատճառով մարդիկ ժամերով սպասում են, այսօր վկաներ կային, որոնք պետք է հարցաքննվեին, հազիվ բերել էինք դատարան, պաշտպանական կողմի վկաներ էին»:

Հիշեցնենք, որ Հակոբ Դեխնավիին մեղադրանք է առաջադրվել ՀՀ Սահմանադրության փոփոխությունների 06.12.2015թ. հանրաքվեի օրը Երևան քաղաքի թիվ 4/01 ընտրական տեղամասում գրանցվելով որպես զանգվածային լրատվության միջոցի ներկայացուցիչ և ներկա գտնվելով հանրաքվեի ընթացքին՝ ժամը 17:00-ի սահմաններում բռնություն գործադրելով խոչընդոտել է հանրաքվեի հանձնաժողովի աշխատանքը:

Մեր հարցին՝ գործով ձեռք բերված  ինչ ապացույցներ եք արդեն դատարանում քննել, որոնք ապացուցում են Դեխնավիի անմեղությունը, պարոն Գյուրջյանը պատասխանեց. «Գրեթե բոլոր վկաները ցուցմունք տալիս են այն մասին, որ Դեխնավիի ու հանձնաժողովի նախագահի միջեւ միջադեպ է եղել, բայց արդեն բովանդակային առումով, թե ով ում ինչ է արել, մասամբ խուսափողական են, իրար հակասող վկաներ կան, որոնք հայտնում են, որ Դեխնավիին են խփել, վկաներ կան, որոնք հայտնում են՝ հակառակն է եղել…ամեն դեպքում, դեռեւս չի հիմնավորվում այն հանգամանքը, որ Դեխնավիի արարքի հետեւանքով հանձնաժողովի աշխատանքը խոչընդոտվել է ու ստեղծվել է հանձնաժողովի աշխատանքը շարունակելու անհնարինություն»:

Արփինե ՍԻՄՈՆՅԱՆ