Հայաստանի կառավարության նոր ծրագիրը, ըստ ՀՀԿ խոսնակ Էդուարդ Շարմազանովի, բավականին լուրջ հայտ է, որը իր մեջ ներառում է մայիսի 18-ին Ազգային ժողովի առաջին նիստում ՀՀ նախագահի ծրագրային ելույթի թիրախները:
Այսօր՝ ՀՀԿ ԳՄ նիստից հետո պարոն Շարմազանովը լրագրողների հետ զրույցում ասաց, որ կառավարությունը նոր ծրագրով առաջարկում է տնտեսական աճի հստակ թիրախ ընտրել տարեկան 5 տոկոսը. «Առաջարկվում է 5 տարվա կտրվածքով նվազագույն աշխատավարձի աճի թիրախ սահմանել 25 տոկոսը: Առաջարկվում է նաեւ գործազրկության 12 տոկոս նվազում: Կառավարությունը նախատեսում է Հայաստան այցելող զբոսաշրջիկների թիվը հասցնել տարեկան 3 միլիոնի»:
Պարոն Շարմազանովը նաեւ ասաց, որ կառավարության աշխատանքում հակակոռուպցիոն բարեփոխումները առանցքային տեղ կունենան. «Մեծ կարևորություն է հատկացվում անվտանգությանը: Մենք շարունակելու ենք ամրապնդել Հայաստանի Հանրապետության անվտանգությունը»:
Ըստ նրա` կառավարության ծրագիրն արդեն հաջորդ շաբաթ կներկայացվի Ազգային ժողովին, իսկ վարչապետ Կարեն Կարապետյանը հաշվետվություն կներկայացնի կատարված աշխատանքների վերաբերյալ. «Կարող եմ ասել, որ ՀՀԿ-ն ու ՀՅԴ-ն կարողացել են ներկայացնել իրատեսական ծրագիր, որտեղ հստակ թիրախներ են ընտրված»:
Արփինե ՍԻՄՈՆՅԱՆ
