«Ոսկե ծիրան» Երևանի միջազգային կինոփառատոնի կազմակերպիչները հունիսի 16-ին ներկայացրեցին 14-րդ փառատոնի արտամրցութային ծրագրերը: Դրանցում ավանդաբար ներառված են լինում Կաննի, Բեռլինի և Վենետիկի միջազգային կինոփառատոնների մրցանակակիր ֆիլմերը:
Արտամրցութային ծրագրերում, ընդհանուր առմամբ կցուցադրվի ավելի քան 70 ֆիլմ:
Դրանցից մեկը կորեացի ռեժիսոր Կիմ Կի–դուկի «Ուռկանը» ֆիլմն է (2016թ.):
Այն պատմում է Հյուսիսային Կորեայում ապրող մի ձկնորսի մասին, որը նավակի անսարքության պատճառով հայտնվում է «թշնամական հողում»` Հարավային Կորեայի տարածքում: Սահմանային ոստիկանությունը ձերբակալում է ձկնորսին ու ենթարկում դաժան տանջանքների: Հերոսի ճակատագրի միջոցով ցույց է տրվում ծաղկող հարեւան երկրի մյուս «դեմքը»: Հայրենիք վերադառնալուց հետո էլ ձկնորսը հանգիստ չի ունենում, քանի որ այստեղ էլ հայրենի իշխանություններն են այլ աչքով նայում:
Հիշեցնենք, որ աշխարհահռչակ ասիացի ռեժիսորը Երեւան էր ժամանել 2014-ին, «Ոսկե ծիրան» կինոփառատոնի շրջանակում: Նա նաեւ գրանցել էր սելֆիների ռեկորդային թիվ` հայաստանցի կինոսիրողների հետ:
Պատրաստեց Գոհար ՀԱԿՈԲՅԱՆԸ
