«Ոսկե ծիրան» 14-րդ Երևանի միջազգային կինոփառատոնի շրջանակում կկայանա Ռուբեն Էսթլունդի (Շվեդիա) «Քառակուսի» ֆիլմի պրեմիերան: Ֆիլմը այս տարի Կաննի 70-րդ կինոփառատոնում արժանացել է «Ոսկե արմավենի» մրցանակի:
Կաննի ժյուրին, որ նախագահում էր Պեդրո Ալմոդովարը, «Քառակուսին» գնահատել է իբրեւ ժամանակակից, նորարար, պարադոքսալ, լպիրշ, բայց ինտելեկտուալ ֆիլմ:
«Քառակուսին» արվեստի պրիզմայով ներկայացնում է Շվեդիան: Գլխավոր հերոսը` Քրիստիանը, նորաբաց թանգարանի կուրատոր է: Նա խնդիրներ ունի անձնական կյանքում եւ աշխատանքում: Քրիստիանն ամուսնալուծված է, բայց փորձում է լավ հայր լինել զավակների համար, եւ հրաշալի աշխատակից` թանգարանի համար: Սակայն իրականում, դա որեւէ մեկին կարծես պետք չէ: Ու այսպես այնքան ժամանակ, մինչեւ ընկերը խորհուրդ է տալիս. «Մի’ եղիր այդքան շվեդ»:
«Քառակուսին» ինստալացիայի անվանումն է, որի հեղինակը ինքը` Էսթլունդն է: Քառակուսին մետաֆոր է: Այն խորհրդանշում է հավասարության պատրանքը նաեւ ներկայացնում է սահմանները, որոնք չպետք է անցնել: Ի վերջո, «Քառակուսին» ինչ-որ առումով նաեւ Մալեւիչի «Սեւ քառակուսու» պատասխանն է:
Պատրաստեց Գոհար ՀԱԿՈԲՅԱՆԸ
