Ադրբեջանի պաշտպանության նախարարությունը տեղեկատվություն էր տարածել, թե Ղազախի շրջանի Քեմեռլի գյուղում մոտ 50 տարեկան հայ տղամարդ է հայտնվել:
Aravot.am-ը կապ էր հաստատել Քեմեռլի գյուղի հետ սահման ունեցող Նոյեմբերյանի տարածաշրջանի համայնքի ղեկավարների հետ, սակայն նրանք հերքել էին այն լուրը, որ իրենց գյուղերից տղամարդ է անհետացել:
Ըստ շրջանառվող լուրերի տղամարդը 1974 թվականի նոյեմբերի 16-ին ծնված Զավեն Կարապետյանն է, որն, իբրեւ, Դովեղի բնակիչ է:
Սակայն ընտրողների ռեգիստրի տվյալների համաձայն՝ 1974 թվականին ծնված Զավեն Կարապետյան անունով մարդը գրանցված է Վանաձոր քաղաքում՝ Մայմեխի խճուղի հասցեում: Նշված հասցեում է տեղակայված նաեւ Վանաձորի տարեցների տունը:
Aravot.am-ը տարեցների տան տնօրենից փորձեց հետաքրքրվել թե արդյոք նշված տվյալներով անձնավորություն գրանցվա՞ծ է իրենց մոտ: Սակայն մեր զանգերն այդպես էլ մնացին անպատասխան, տնօրեն Մանուշակ Օհանյանը չցանկացավ խոսել այդ մասին:
Վանաձորի քաղաքապետ Մամիկոն Ասլանյանը մեզ հետ զրույցում ասաց, որ տղամարդը տարեցների տանը գրանցվել է, քանի որ բնակության վայր չի ունեցել. «Կարծեմ այդ մարդը Երեւանի մանկատներից մեկի սանն է եղել: 2000 թվականի կեսերին եկել է Վանաձոր, ծերանոցում գրանցվել, որպեսզի անձնագիր ստանա: Բնակության վայր, կացարան ոչինչ չի ունեցել: Տարբեր տեղեր է գիշերել, մի որոշակի ժամանակ նաեւ աղբահանության մեջ է աշխատել: Տարօրինակ տղա է, խնդիրներ ունեցող: Ինքը ծագումով վանաձորցի չէ: Մի որոշակի ժամանակով հայտնվել է ու նորից անհետացել»:
Տաթեւիկ ՂԱԶԱՐՅԱՆ
