«Ժառանգություն» կուսակցության առաջնորդ, ՀՀ նախկին արտգործնախարար Րաֆֆի Հովհաննիսյանն այսօր կուսակցության համագումարի ընթացքում լրագրողների հետ զրույցում անդրադարձավ հարցին, թե ինչպես է պատկերացնում համագումարի բանաձեւում ամրագրված «թավշյա հեղափոխության» իրականացումը: «Դա սահմանադրական հեղափոխություն է, որը ՀՀ-ում չի եղել: Ժողովրդի ճնշմամբ եւ ակտիվ մասնակցությամբ պետք է իրացվի սահմանադրությունը, քանի որ ընտրական գործընթացներով այդ հարցը չի լուծվում»,-ասաց Րաֆֆի Հովհաննիսյանը:
«Գուցե դա լինի հաջորդ տարվա ապրիլի՞ն, երբ Սերժ Սարգսյանը որոշելու է՝ մնա՞լ իշխանությունում, թե ոչ» հարցին Րաֆֆի Հովհաննիսյանն այսպես արձագանքեց. «Այո, գուցե ուղղված լինի հենց ապրիլին: Նա շատ է փոխվել…Նա ազատամարտիկ է եղել, բայց ի՞նչ է փոխվել նրա մեջ, որ հիմա ընտրակեղծարարության է դիմում: Եթե դարձ չունենա դեպի իր անցյալը եւ այսպես շարունակի, կասկած չունեմ, որ հենվելով կեղծված ընտրությունների վրա՝ այս կամ այն պաշտոնով կուզենա երկարաձգել իր իշխանությունը»:
Հովհաննիսյանի խոսքով՝ ժողովուրդը վերջապես պայքարով պետք է ունենա հանրապետություն, ոչ թե «սերժապետություն» եւ կուսակցապետություն. «Գարնանն իշխանազավթման հերթական փուլն է լինելու, դրանից բխում է քաղաքացիական նոր ալիքի բարձրացման հնարավորությունը»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
