Թուրք կինոռեժիսոր, սցենարիստ եւ պրոդյուսեր Զեքի Դեմիրքուբուզի «Անթեղ» ֆիլմը (Ember 2016) «Ոսկե ծիրանի» խաղարկային մրցույթում է:
Զեքի Դեմիրքուբուզի ֆիլմերը ցուցադրվել են բազմաթիվ հեղինակավոր կինոփառատոնում, ի թիվս այլ մրցանակների, նա «Ոսկե նարինջ» է ստացել Անթալիայի կինոփառատոնում:
Ինչպես նրա մյուս ֆիլմերում, այնպես էլ «Անթեղում» արծարծվում է մարդկային բարոյականության եւ էթիկայի դիլեման:
Ֆիլմի հերոսուհին` Էմինեն հիվանդ երեխա ունի, շտապ անհրաժեշտ է վիրահատություն, քանի որ սրտի արատը կարող է փոքրիկի մահվան պատճառ դառնալ: Էմինեի ամուսինը` Քեմալն ասես անհետ կորած լինի, որոշ տեղեկություններով Ռումինա է գնացել փող աշխատելու: Քեմալը նախկին վետերան է, գործազուրկին բնորոշ հիվանդ ինքնասիրությամբ եւ ասիացու խանդոտությամբ:
Քեմալի բոսը`Զիան, որը նաեւ գործընկերային հարաբերություններ է ունեցել Քեմալի հետ, վճարում է նրա երեխայի սրտի վիրահատության համար: Զիան անթեղված զգացմունքներ ունի Էմինեի հանդեպ, որոնք չի կարող հաղթահարել: Էմինեն դավաճանում է ամուսնուն, իսկ պատից նրանց է նայում ընտանեկան լուսանկարը: Սակայն դա անասնական կրքերի արդյունքում արված քայլ չէ, Էմինեն էլ անտարբեր չէ Զիայի նկատմամբ:
Որոշ ժամանակ անց անսպասելի տուն է վերադառնում Քեմալը: Նա այլեւս անհանգիստ է, դյուրագրգիռ, աշխատում է Զիայի «ձեռքի» տակ, բայց զգում է, որ նրա եւ իր կնոջ միջեւ ինչ-որ բան է եղել: Ռեժիսորը շատ նուրբ հյուսում է Քեմալի ընտանեկան դրաման, նաեւ Զիայինը: Վերջինս կնոջից բաժանվելու շեմին է: Պատճառն Էմինեն է: Էմինեն էլ չի ցանկանում ուրիշի ընտանիքի կործանման պատճառ դառնալ, նաեւ խնայում է ամուսնուն` խոստովանել ճշմարտությունը, քանի որ մտածում է` կնսեմացնի նրա արժանապատվությունը:
Ֆիլմն անսպասելի ավարտ ունի. պարզ չէ` ո՞ւմն է Էմինեի երեխան, հայտնի չէ իսկապե՞ս ավտովթարի է ենթարկվել Զիան, եւ վերջապես ինչո՞ւ է որոշել ընտանիք վերադառնալ Քեմալը, որը խանդից ու կասկածանքից դրդված կնոջը սպանելու մեծ ցանկություն ուներ ու երկար ժամանակ ապրում էր արտադրամասում:
Զեքի Դեմիրքուբուզը նաեւ գրող է: Նա յուրատեսակ մեկնաբանություն է տվել Ֆ. Դոստոևսկու «Գրառումներ ընդհատակից» գործին` ստեղծելով իր «Ներքուստ» (Yeraltı) ֆիլմը: Այստեղ էլ նա անդրադարձ է կատարել մարդկային բանականության մութ կողմերին: Ընդհանրապես նրա ֆիլմերը մտածելու տեղիք են տալիս: Դրանցում յուրատեսակ ուղերձ կա` այնպես ապրիր, որ հետո չզղջաս:
Գոհար ՀԱԿՈԲՅԱՆ
