Ապրիլի 27-ին հայտնի փաստաբան Տիգրան Աթանեսյանի գրասենյակում փաստաբանների միջեւ ծեծկռտուքի փաստով հարուցված քրեական գործի շրջանակներում 5 անձի մեղադրանք է առաջադրվել՝ ՀՀ քր. օր. տարբեր հոդվածներով, մասնավորապես՝ 118 հոդվածով (ծեծ), 117-ով (դիտավորությամբ առողջությանը թեթեւ վնաս պատճառելը). 113-ով (դիտավորությամբ առողջությանը միջին ծանրության վնաս պատճառելը)։
Այս մասին ասաց ՀՀ քննչական կոմիտեի նախագահի խորհրդական Սոնա Տռուզյանը։
Նա հավելեց, որ հինգ անձի նկատմամբ որպես խափանման միջոց է ընտրվել երկրից չհեռանալու մասին ստորագրությունը։ Նրա խոսքով, եւս մեկ անձ հրավիրվել է հարցաքննության, թե ինչ կարգավիճակով՝ չասաց։ Նշենք, որ այդ անձը փաստաբան Տիգրան Աթանեսյանն է։ Վերջինս ուրբաթ օրը՝ հունիսի 24-ին ֆեյսբուքյան իր էջում գրառում էր կատարել՝ կից ներկայացնելով քննիչի կողմից ուղարկված ծանուցագիրը, որտեղ նա որպես մեղադրյալ հրավիրվում է հարցաքննության։
Գործով մեղադրյալ 5 անձինք են փաստաբան Արմեն Սողոմոնյանը, ՀՀ փաստաբանների պալատի նախագահի խորհրդական Գեւորգ Մկրտչյանը, ՀՀ փաստաբանների պալատի նախագահի արտաքին հարաբերությունների գծով խորհրդական Վրեժ Խաչիկյանը, Փաստաբանների դպրոցի տնօրեն Սիմոն Բաբայան եւ Արսեն Հարությունյանը։ Նույն գործի շրջանակներում, բացի Գեւորգ Մկրտչյանից, մյուս թվարկածները, այդ թվում՝ Տիգրան Աթանեսյանն ունեն նաեւ տուժողի կարգավիճակ։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
