Հայաստանի Հանրապետությունում Լեռնային Ղարաբաղի Հանրապետության մշտական ներկայացուցչության խորհրդատու-խորհրդական Գառնիկ Իսագուլյանը մնացել է այն համոզմանը, որ ղարաբաղյան հակամարտության հարցում ժամանակն է՝ հայկական կողմն անցնի կանխարգելիչ գործողությունների:
«Մինսկի խմբի նախավերջին հայտարարությունը սխալ գնահատվեց մեր քաղաքական գործիչների կողմից, երբ հայտարարվեց, թե հակաադրբեջանական հայտարարություն է արվել: Ես ասացի, որ համեմատաբար օբյեկտիվ հայտարարություն էր, և ճիշտ չէ, որ մեր քաղաքական գործիչներն օգտագործում են տերմիններ, որոնք իրականության հետ կապ չունեն»,-այսօր «Տեսակետ» ակումբում ասաց Գառնիկ Իսագուլյանը:
Անդրադառնալով Սերժ Սարգսյանի այն հայտարարությանը, թե «աչքս չեմ թարթելու, հարկ եղած դեպքում, «Իսկանդերի» համազարկի հրաման արձակելիս»` պարոն Իսագուլյանը շարունակեց. «Հավատացե՛ք, թե՛ ՀՀ նախագահ Սերժ Սարգսյանի ելույթը, թե՛ դրանից հետո Բակո Սահակյանի ելույթը, թե՛ հետագայում ուժային կառույցների ղեկավարների ելույթները պետք է ուշադիր կարդալ և փորձել հասկանալ այն խորքը, որ կա… Ես չեմ կարծում, որ իրականությանը համապատասխանում են այն գնահատականները, թե շուտով սպասվում է պատերազմի վերսկսում: Ես կարծում եմ՝ ՀՀ նախագահ Սերժ Սարգսյանի այն հայտարարությունը, որ ինքը աչք չի թարթի, եթե անհրաժեշտություն լինի, որ աշխատեն մեր «Իսկանդեր» համակարգերը, որոշ տաք գլուխների համար բավականին սառը ցնցուղ էր, և կարծում եմ, որ շատերը հասկացան, որ դրանք ոչ թե միայն խոսքեր են, այլ բավականին լուրջ են»:
Արփինե ՍԻՄՈՆՅԱՆ
