Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստի ընթացքում ընդունվեց «Անկախ մեդիայի և լրագրողների նկատմամբ քաղաքական ազդեցությունը» խորագրով բանաձևը: ԵԽԽՎ-ն ուղիներ է փնտրում ԶԼՄ-ներին քաղաքական ազդեցություններից ազատելու, ինչպես նաեւ լրագրողների ու լրատվամիջոցների անվտանգությունն ապահովելու համար:
Ստեֆան Շեննախի (լուսանկարում) պատրաստած զեկույցում ԵԽԽՎ-ն խորը մտահոգություն է հայտնում անկախ մեդիայի վրա օրեցօր աճող քաղաքական ազդեցության վերաբերյալ: Բանաձևում ամրագրված է, որ նորանոր ռազմավարություններ և մեթոդներ են մշակվում վերացնելու անկախ լրագրությունը և լրագրողներին ինքնագրաքննության մղելու համար: Բանաձևում որպես անկախ մեդիային վնասող ամենալուրջ գործոն համարվում է ֆինանսական կախվածության հարցը:
Ուստի կոչ է արվում անդամ պետություններին տեղում ձեռնարկել կանխարգելիչ գործողություններ. օրինակ՝ բարելավել օրենսդրությունը՝ ապահովելով ԶԼՄ-ների սեփականության թափանցիկություն, ապահովել դաշտում կարգավորումներ իրականացնող մարմինների աշխատանքի թափանցիկություն, ապահովել հանրային լրատվամիջոցների ղեկավարների և աշխատակազմի նշանակման չեզոքություն և այլն:
Ըստ այդմ՝ ԵԽԽՎ-ն ամրագրել է, որ մամուլի ազատությունն ու բազմազանությունը ժողովրդավարության ապահովման հիմնարար դրույթներից է, և չի կարող լինել մամուլի ազատություն, երբ լրագրողներն ու նրանց ընտանիքի անդամները ենթարկվում են ֆիզիկական բռնության, երբ լրատվամիջոցը կանգնած է բիզնես նախագիծ դառնալու վտանգի առաջ:
ԵԽԽՎ-ն պահանջում է, որ անդամ երկրների իշխանությունները ոչ միայն երաշխավորեն լրագրողների անվտանգությունը, այլև նրանց հեռու պահեն ավելի նենգ մեթոդներից: Բանաձևում ներկայացված է եզրակացություն, որ այն լրատվամիջոցները, որոնք չունեն պետական ֆինանսավորում, քաղաքական ազդեցության տեսանկյունից ավելի խոցելի են դարձել:
Վեհաժողովը խստորեն պահանջում է բոլոր քաղաքական ուժերին դատապարտել լրագրողների նկատմամբ ցանկացած բռնություն, ոտնձգություն կամ կիբերհարձակում: Ըստ ԵԽԽՎ-ի՝ իհարկե, քաղաքական ուժերն իրավունք ունեն արձագանքելու լրատվամիջոցներով իրենց հասցեին հնչած քննադատություններին, սակայն դա չպետք է վերածվի ԶԼՄ-ի կամ լրագրողի թիրախավորման:
Վեհաժողովը նաև կոչ է անում լրագրողական կազմակերպություններին լինել ակտիվ բացահայտելու այն անձանց, որոնք լրագրող լինելու անվան ներքո չարաշահումներ են կատարում և մանիպուլացնում հասարակությանը:
Տաթև ՀԱՐՈՒԹՅՈՒՆՅԱՆ
