«Ժառանգություն» կուսակցության առաջնորդ Րաֆֆի Հովհաննիսյանն անմնացորդ սիրով սիրում է կուսակցության նախկին անդամներ Անահիտ Բախշյանին եւ Զարուհի Փոստանջյանին: «Ափսոսում եմ, որ գնացին, բայց անհրաժեշտ էր, որ գնային, որովհետեւ բոլորս էլ «էտման» կարիք եւ անհրաժեշտություն ունենք: Ամեն մեկն իր վրա պետք է աշխատի եւ «էտվի», սա թարմացման եւ ապագայի խնդիր է»,-«Հայացք» մամուլի ակումբում այսօր ասաց նա:
Րաֆֆի Հովհաննիսյանի խոսքով՝ ինքը հպարտ է Զարուհի Փոստանջյանով եւ Անահիտ Բախշյանով, որոնց քաղաքացիական նվիրումն ու տեսակը շատ է գնահատում. «Նրանք, միաժամանակ ասեմ, որ կայացել են «Ժառանգության» դպրոցի շնորհիվ: Եթե չլիներ «Ժառանգության» դպրոցը, եթե չլիներ նախորդ գումարման ԱԺ-ն, իրենք չէին լինի այն, ինչ կան այսօր»։
Հովհաննիսյանը հաջողություններ մաղթեց Զարուհի Փոստանջյանին եւ Անահիտ Բախշյանին՝ ավագանիում հետագա գործունեության մեջ:
Լուիզա ՍՈՒՔԻԱՍՅԱՆ
