Խորհրդարանում շարունակվող 2016 թվականի բյուջեի կատարողականի քննարկումների ժամանակ «Ելք» խմբակցության ղեկավար Նիկոլ Փաշինյանը փոխոստիկանապետ Անուբախ Համբարյանից հետաքրքրվեց բնակարանային գողություններից: Անցած տարի գրանցվել է բնակարանային գողությունների 1258 դեպք, որից 67 տոկոսը չի բացահայտվել: «Սա չի՞ նշանակում, որ ոստիկանության գործողությունների արդյունքում շահավետ ու անվտանգ գործ է դարձել բնակարանային գողությունը»,- ասաց պատգամավորը։
Անուբախ Համբարյանը վստահեցրեց, որ տնային գողությունների փաստերը քչացել են:
«Անցած տարի Ժիրայր Սեֆիլյանի ձերբակալությունից հետո տեղի ունեցան ՊՊԾ գնդի իրադարձությունները։ Այն, ինչ տեղի է ունեցել, ԱԱԾ-ում ծառայողական քննություն իրականցվե՞լ է, փաստերի համադրումը ինչ-որ արդյունքների հանգեցրե՞լ է»,- Նիկոլ Փաշինյանի այս հարցն էլ ուղղված էր անցած տարվա բյուջեի կատարողականը ներկայացնող ԱԱԾ պետի տեղակալ Արամ Հակոբյանին: «Եթե անգամ կատարվել է, դա գաղտնիք է ու մեր պահուստներում է արդեն։ Նման լսարանում ես իրավունք չունեմ պատասխանելու այդ հարցին»,- ասաց ԱԱԾ պետի տեղակալը։ Նիկոլ Փաշինյանը արձագանքեց`չմանրամասնելով. «Ես ձեր պատասխանը հասկացա»:
Նելլի ԳՐԻԳՈՐՅԱՆ
