Օպերայի եւ բալետի ազգային ակադեմիական թատրոնի նվագախմբի երաժիշտներն ու բալետի պարողները մի քանի օր շարունակ բացատրագրեր գրեցին, թե ով եւ ինչու տապալեց հունիսի 8-ին նախատեսված «Գայանե» բալետի ներկայացումը։ Ու թեեւ թատրոնի գեղղեկավարի տեղակալ Կարեն Շահինյանը նշել էր, որ բացատրագրերը ոչ մի արդյունք չտվեցին, քանի որ ոչ ոք ոչ մեկի անունը չի տվել, այդուհանդերձ, օրեր առաջ որոշ երաժիշտների նկատմամբ կիրառվել է խիստ նկատողություն, իսկ նախկին փոխտնօրեն Նարեկ Անտոնյանն իր վրա է վերցրել կատարվածի պատասխանատվությունը, ինչին, սակայն, օպերային թատրոնում չեն հավատում։
Մշակույթի նախարար Արմեն Ամիրյանին մի քանի հարց ուղղեցինք թատրոնում տեղի ունեցող հետզարգացումների մասին։
– Պարոն Ամիրյան, բացատրագրերն ի՞նչ արդյունք տվեցին, 42 հոգու խիստ նկատողություն է տրվել, այդպե՞ս է։
– Հետո 42-ը վերանայվեց եւ դարձավ 26-28, մեղմացրինք չափորոշիչները։
– Այսինքն՝ խոստացված պատիժը դա էր՝ նկատողություն։
– Այո, խիստ նկատողություն, եւ օպերայի ղեկավարությունը որոշում կայացրեց զրկել հավելավճարներից այն մարդկանց, ովքեր ստացել էին խիստ նկատողություն։
– Պարզեցի՞ք, թե ովքեր են կազմակերպիչները։
– Այո, փոխտնօրեններից մեկը՝ Նարեկ Անտոնյանը, որ ստացել էր ազատման ծանուցագիր, գրել էր նաեւ ազատման դիմում՝ ըստ էության, փաստելով ու պատասխանատվությունը վերցնելով իր վրա։
– Բայց, շատերի կարծիքով, կազմակերպիչը նա չի եղել, այլ ուղղակի կատարվածը, հանգամանքներից ելնելով, վերցրել է իր վրա։ Դուք տեղյա՞կ եք դրա մասին։
– Չեմ ուզում ավելի հետամուտ լինել, որովհետեւ եղավ այն, ինչ եղավ, պատժվեցին նրանք, ովքեր չէին մասնակցել ներկայացմանը։ Այսօր արդեն շատ առողջ մթնոլորտ է օպերայում, ներկայացումները նորովի բեմադրվում են, սպասում ենք առաջնախաղերի։ Չեմ ուզում շատ քչփորել, որպեսզի առավել վնաս չհասցնենք ստեղծագործական մթնոլորտին, բայց այն մարդիկ, ովքեր կազմակերպել էին դա, կարծում եմ՝ իրենց դասն առան այդ պատմությունից։
Սոնա ԱԴԱՄՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
