Հուլիսի 7-ին Երևանի քաղաքապետարանում կայացավ Երևանի քաղաքապետի տեղակալ Արամ Սուքիասյանի և «Ոսկե ծիրան» միջազգային կինոփառատոնի հիմնադիր և գլխավոր տնօրեն Հարություն Խաչատրյանի համատեղ մամուլի ասուլիսը: Նրանք ներկայացրին հուլիսի 9-16-ը մայրաքաղաքում անցկացվելիք «Ոսկե ծիրան» 14-րդ կինոփառատոնի շրջանակում նախատեսված միջոցառումները:
Արամ Սուքիասյանն ասաց, որ փառատոնը քաղաքապետարանի ուշադրության կենտրոնում է լինելու, իսկ կինոյի հանրահայտ գործիչների համար ընդունելություն կկազմակերպվի: Նրա ձեւակերպմամբ, «Ոսկե ծիրանը» սիրված է ինչպես զբոսաշրջիկների, այնպես էլ մեր կինոսեր հանրության կողմից:
Քաղաքապետի տեղակալը անդրադարձավ նաեւ բացօթյա տարածքներում կինոցուցադրություններին եւ «Մոսկվա» կինոթատրոնի շրջակայքում կայանալիք ջազային համերգներին:
Հարություն Խաչատրյանն էլ փաստեց, որ 14-րդ «Ոսկե ծիրանի» ծրագիրն իրոք շատ հարուստ է եւ բազմազան: Նա ասաց, որ տարիներ շարունակ Երեւանի քաղաքապետարանը իրենց աջակիցների թվում է: Նրա խոսքով՝ շատ դժվար է փառատոն կազմակերպելը: Պարոն Խաչատրյանը չթաքցրեց, որ երբեմն լինում են դժգոհություններ այն ռեժիսորների կողմից, որոնց ֆիլմերը չեն ընտրվում կամ մրցանակներ չեն ստանում:
Ինչ վերաբերում է Կաննի, Վենետիկի, Բեռլինի, Ռոտերդամի փառատոների լավագույն ֆիլմերին, դրանք` շուրջ 20-22 ֆիլմ, կունենան երեւանյան պրեմիերաներ: «Ոսկե ծիրանի» հիմնադիրը փաստեց, որ վերջերս ռուսական լրատվամիջոցներից մեկը գրել էր, թե «Ոսկե ծիրանը» «գողացել» է այն բոլոր ֆիլմերը, որոնք պետք է լինեին Մոսկվայի կինոփառատոնին: Ի դեպ, Ա դասի փառատոների նման «Ոսկե ծիրանը» «կույս» ֆիլմեր չի ցուցադրում, բայց դրանց գոնե երկրորդ ցուցադրությունը Երեւանում է լինում:
Պարոն Խաչատրյանը նաեւ տեղեկացրեց, որ այս տարվա «Եղիցի լույս» մրցանակը կշնորհվի Տիգրան Մանսուրյանին:
Ասուլիսի ժամանակ ինֆորմացիոն ծրագրում ԼԳԲՏ համայնքի վերաբերյալ ֆիլմին էլ անդրադարձ եղավ, որը հանվել է: Հարություն Խաչատրյանն ասաց, որ 14 տարվա ընթացքում փառատոնը որեւէ գրաքննության ու ուղղորդման չի ենթարկվել, ինչ վերաբերում է Մալյան թատրոնում ցուցադրվող ֆիլմերի ցուցադրությանը, դա իրականացնում է Կինեմատոգրաֆիստների միությունն անվճար, որը նկատի ունենալով միության նախագահ Ռուբեն Գեւորգյանցի մահը, որոշել է հեռու մնալ ֆիլմի հետ կապված աժիոտաժից: Պարոն Խաչատրյանը հավելեց, որ ծրագիրը կվերականգնվի հաջորդ տարի, իսկ նշյալ ֆիլմը գեղարվեստական եւ սցենարական առումով արժեքավոր չէր:
Ջո Բեռլինգերի, Ջուջին Քորի, Հյու Հադսոնի եւ մյուսների ֆիլմերը Հայաստան բերելն էլ, ըստ բանախոսի, հեշտ չէ, դրանց համար մեծ գումարներ են անհրաժեշտ, ամիսների քրտնաջան աշխատանք եւ անձնական կապեր:
«Լավ փառատոնի գրավականը լավ ժյուրին է, լավ ֆիլմերը, լավ քաղաքն ու մթնոլորտը: Մեր պարագայում այդ ամենը կա»,-շեշտեց Հարություն Խաչատրյանը:
«Ոսկե ծիրանի» հիմնադիր նախագահը նաեւ հույս հայտնեց, որ 2018-ին կնշվի «Ոսկե ծիրանի» հիմնադրման 15-ամյակը, եւ կբացվեն Սերգեյ Փարաջանովի ու Տիգրան Մանսուրյանի աստղերը` Շարլ Ազնավուրի հրապարակում: Երկուսի 80-ամյակն էլ լրանում է այդ տարի:
Գոհար ՀԱԿՈԲՅԱՆ