Հունիսի 25-ին, ժամը 23․00 մոտակայքում Գյումրու կենտրոնական Սայաթ-Նովա փողոցում գտնվող «Պոնչիկ-Մոնչիկ» սրճարանի դիմաց հնչած կրակոցների փաստով ոստիկանությունը հետախուզում է 34-ամյա Արտյոմ Ղազարյանին։ Այս մասին տեղեկանում ենք ոստիկանության պաշտոնական կայքից։
Ըստ նույն կայքի, Սայաթ-Նովա փողոցում գտնվող «Պոնչի-Մոնչիկ» սրճարանի դիմաց այդ ժամին տեղի է ունեցել փոխհրաձգություն, որին, նախնական տվյալներով, մասնակցել են 34-ամյա Արտյոմ Ղազարյանը, 31-ամյա Կարեն Սարգսյանն ու տուժողը՝ 30-ամյա Գեորգի Հակոբյանը։ Ոստիկանությունը պարզել է, որ Գեորգի Հակոբյանին հրազենային վնասվածք է պատճառել Արտյոմ Ղազարյանը։ Հիշեցնենք, որ նա օրենքով գող Անդրանիկ Սողոյանի՝ Զապի քրոջ որդին է, որը նույնպես օրենքով գող է։
Դեպքի առիթով հարուցվել է քրեական գործ՝ սպանության փորձի և ապօրինի կերպով զենք-զինամթերք ձեռք բերելու, իրացնելու, պահելու, փոխադրելու կամ կրելու հատկանիշներով։ Ըստ ոստիկանության տարածած տեսանյութի, Արտյոմ Ղազարյանին մեղադրանք է առաջադրվել ու նրա նկատմամբ հայտարարվել է հետախուզում։ Սպանության փորձին օժանդակելու կասկածանքով հայտնաբերել ու բերման են ենթարկել 31-ամյա Կարեն Սարգսյանին, նրան նույնպես մեղադրանք է առաջադրվել, իսկ հուլիսի 1-ին կալանավորվել է։
Ոստիկանության տեսանյութում նաև հիշեցվում է, որ Կարեն Սարգսյանը նախկինում դատապարտված է եղել գողության մեղադրանքով։ Հավելենք, որ 31-ամյա Կարեն Սարգսյանը, որը հայտնի է Չախալ մականվամբ, իրավապահ համակարգի ու մամուլի ուշադրության կենտրոնում հայտնվել էր նաև այս տարվա փետրվարի 28-ին, երբ Շիրակի մարզի ընդհանուր իրավասության դատարանում Հրաչիկ Միրզոյանի դանակահարության գործը քննելիս՝ հարձակվել էր «Ասպարեզ» թերթի ու asparez.am կայքի լրագրող Անահիտ Սիմոնյանի վրա, խլել ֆոտոապարատը ու փախել անհայտ ուղղությամբ։
Մանրամասները` տեսանյութում
