Ինչպես տեղեկացրել ենք, արգետինահայ երեք մեծահարուստ ընկերներ՝ Նշան Դեվեճիէանը, Պողոս Էսերճիէանը և Գրիգոր Շիմշիրօղլուն, որոնք մեծ ներդրումներ են կատարում հայրենիքում՝ Արցախում ու Հայաստանի տարբեր տեղանքներում, այսօր Շիրակի մարզում էին։ Նրանք Աշոցքի «Տիրամայր Նարեկ» բարեգործական հիվանդանոցին համակարգչային տոմոգրաֆիայի կաբինետ նվիրեցին, մասնակցեցին իրենց ֆինանսավորմամբ Վրաստանին սահմանամերձ Բավրա գյուղում կառուցված հնդկացորենի վերամշակման գործարանի բացմանը։
Aravot.am-ը Պողոս Էսերճիէանին, հիշեցնելով թուրքական մամուլի հիստերիան Հռոմի պապ Ֆրանցիսկոսի անցած տարի Հայաստան կատարած այցի կապակցությամբ, հետաքրքվեց, թե հայ համայնքը շարունակո՞ւմ է պահպանել ակտիվ շփումներ նրա հետ։ Արգենտինահայ բարերարն ասաց, որ Հռոմի պապը, լինելով արգենտինացի, միշտ կապված է եղել հայ համայնքի հետ։ «Մեր Սրբազանը խնդրեց, որ նա Հայաստան գա, և մեր Սրբազանին համար Հայաստան այցելեց անցյալ տարի, շատ աղեկ բարեկամներ են մեր պատրիարքը և պապը։ Մենք պապի հետ ակտիվ կապերուն մեջ ենք», -ասաց Պողոս Էսերճիէանը։
Հիշեցնենք, որ անցած տարի Գյումրու Վարդանանց հրապարակում Հռոմի պապի մատուցած պատարագից հետո Սուրբ Աթոռի մամուլի գրասենյակի տնօրեն մոնսինյոր Ֆեդերիկո Լոմբարդին, պատասխանելով արտերկրյա լրագրողներից մեկի այն հարցին, թե արդյոք Հարավային Ամերիկայում ապրելն ու Արգենտինայում հայկական Սփյուռքի հետ շփվելն են ազդել պապի վրա, որպեսզի նա զգա հայի ցավն, ասել էր․ «Ֆրանցիսկոս պապը բազմաթիվ տարբեր փորձառություններ է բերել Արգենտինայում իր վարած կյանքից՝ էկումենիզմը, ավետարանչական բարեկամությունը՝ հրեաների, ռաբիների, մուսուլման իմամի հետ: Նա խորը հարաբերություններ ուներ նաեւ հայկական համայնքի հետ այնտեղ: Ես երեկ տեսա հանդիպումը պապի Բուենոս Այրեսի առաքելական եկեղեցու արգենտինահայ եպիսկոպոսի հետ, նրանք լավ ճանաչում են ու լավ բարեկամ էին: Այս իմաստով պապի համար հայ ժողովուրդը ու հայկական պատմությունը նորություն չեն: Պապի համար մեծ ուրախություն է իրական հայկական մշակույթի, պատմության սկզբնաղբյուրին շփվելն այստեղ: Ըստ իս, սա իր համար ցնծություն է, բայց հիմնվում է գիտելիքի ու երկար նախապատմության վրա»։
Նունե ԱՐԵՎՇԱՏՅԱՆ
