Աջափնյակ եւ Դավիթաշեն վարչական շրջանների ընդհանուր իրավասության դատարանում այսօր քննվում էին դպրոցների եւ մանկապարտեզների տնօրենների՝ «Իրազեկ քաղաքացիների միավորման» դեմ ներկայացրած հայցերը: Այսօր էլ հայցվոր տնօրենները չէին ներկայացել դատարան, միայն գրություն էին ուղարկել՝ խնդրելով կարճել գործի վարույթը:
Հիշեցնենք, որ 30 դպրոցների եւ մանկապարտեզների տնօրեններ դատի էին տվել «Իրազեկ քաղաքացիների միավորում» հասարակական կազմակերպությանը եւ վերջինիս համակարգող Դանիել Իոաննիսյանին՝ «ՀՀԿ-ն չարաշահում է վարչական ռեսուրսը դպրոցներում եւ մանկապարտեզներում» վերտառությամբ աղմկահարույց հրապարակման եւ ձայնագրությունների համար՝ համարելով, որ կազմակերպությունը զրպարտել է իրենց:
Aravot.am-ի հետ զրույցում, անդրադառնալով տնօրենների՝ իրենց փաստաբանի միջոցով արտահայտած պնդմանը, թե իրենք որոշել են ներողամիտ լինել եւ հետ վերցնել հայցադիմումները, «Իրազեկ քաղաքացիների միավորման» համակարգող Դանիել Իոաննիսյանն այսպես արձագանքեց. «Կոլեկտիվ բարիության նոպա է… ինչ ասե՞մ՝ ինչպես կոլեկտիվ՝ «իրարից անկախ» որոշել էին հայց ներկայացնել մեր դեմ, ընդ որում՝ «պատահաբար» ստացվել էր, որ նույնաբովանդակ հայցեր էին ներկայացրել՝ նույն փաստաբանական գրասենյակի միջոցով, այնպես էլ «իրարից անկախ» որոշել են, որ պետք է մեզ՝ «մեղսավորներիս», ներեն»:
Ապա նա հեգնեց. «Չափազանց երախտապարտ ենք, երջանկությունից ուզում եմ շապիկս պատռել»:
Դանիել Իոաննիսյանի բնորոշմամբ՝ հայցադիմումներից հրաժարվելը կուսակցական որոշում է. «Այն ժամանակ էլ Արմեն Աշոտյանը չէր թաքցնում, որ ինքն է կանգնած մեզ դատի տալու նախաձեռնության հետեւում: Բայց նրանք հասցրին հասկանալ, որ դա չափազանց վատ նախաձեռնություն է, որն ավարտվեց ոչ թե մեզ պատժելով, այլ իրենց գլխացավանք պատճառելով»:
Լուիզա ՍՈՒՔԻԱՍՅԱՆ
