Լրահոս
Օրվա լրահոսը

Հայկական հետքեր Մոլդովայում (Ֆոտոշարք)

Հուլիս 20,2017 11:06

Մոլդովայի մայրաքաղաք Քիշնեւը կանաչ քաղաք է, մարդիկ բարեհամբույր են ու սրտաբաց: Մոլդովացիները հպարտանում են, որ իրենց քաղաքում է գտնվում տարածաշրջանի ամենամեծ կրկեսը, որի որոշ դահլիճներ վերջերս են վերանորոգվել: Քաղաքը նաեւ Աբսուրդի թատրոն ունի, որը նույնպես նրանց հպարտության առարկան է:

Իմիջիայլոց, այստեղի տաքսու վարորդները իրենց տեղեկացվածությամբ ու հետաքրքրասիրությամբ չեն զիջում հայաստանցի գործընկերներին: Ուղեւորների հետ խոսելու թեման սկսվում է կոռուպցիոն գործունեություն իրականացնելու մեղադրանքով ձերբակալված Քիշնևի քաղաքապետ Դորին Կիրտոակեի ձերբակալությամբ, ավարտվում Բոտանիկ թաղամասում գտնվող Լենինի արձանով:

Այստեղ, ինչպես Հայաստանում, այլեւս տրամվայներ չեն աշխատում, քաղաքային տրանսպորտը նախընտրող մարդիկ երթեւեկում են ավտոբուսներով, տրոլեյբուսներով եւ երթուղային տաքսիներով: Մոլդավացիներն ասում են, որ երթուղայինների մեջ ուղեւորներն իրենց «պահածոյացված» են զգում:

Քիշնեւում չկա նաեւ մետրո: Քիշնեւում եւս հին շենքերը չեն պահպանվել, ամբողջովին նորակառույցներ են եւ աստղեր ունեցող հյուրանոցներ: Քիշնեւում մի փողոց կրում է «1989թ օգոստոսի 31 անունը», այդ օրն ընդունվել է նրանց Լեզվի մասին օրենքը:

Մոլդովայում հայկական համայնք կա, գործում է 4 հայկական եկեղեցի: Ի դեպ, դեռեւս 1401 թ. Սուչավայում հիմնվել է հայկական եպիսկոպոսություն: Ներկայումս Մոլդովայում բնակվում է մոտ 8 հազար հայ: Նրանք ակտիվ մասնակցություն ունեն երկրի տնտեսական ու մշակութային կյանքին:

Քիշնեւում գործում է հայկական Սուրբ Աստվածածին եկեղեցին, կիրակնօրյա դպրոցը, հայ մշակույթի «Անի» կենտրոնը:

Քիշնեւից ոչ հեռու գտնվող Կրիկովա քաղաքի տակ մի ամբողջ գինու թագավորություն է գործում: Նախկին քարհանքի տեղում գինու կոմբինատի հսկայական քաղաք-մառանն է: Ընդ որում քաղաքի ամեն փողոց որեւէ գինու անուն է կրում: Կրիկովայում եղել են շատ անվանի մարդիկ՝ երկրի նախագահներ, շոու-բիզնեսի, կինոյի աստղեր, անգամ տիեզերագնաց Յուրի Գագարինը: Ի թիվս այլոց, Թուրքիայի եւ Ադրբեջանի նախկին եւ ներկա նախագահների նկարների կողքին փակցված է ՀՀ նախագահ Սերժ Սարգսյանի լուսանկարը, Համայն Ռուսիո պատրիարք Կիրիլ Առաջինի նկարն էլ է փակցված Կրիկովայի թանգարանի պատերից մեկին: Տեղեկացանք, որ Ռուսիո պատրիարքը այստեղից է պատվիրում Զատկական գինիները:

Մոլդովական գինուն տեղացիները վերաբերվում են որպես ազգային արժեքի:

Քիշնեւի կենտրոնական փողոցներից մեկը կոչվում է Արմյանսկայա:

Գոհար ՀԱԿՈԲՅԱՆ

Մոլոդովա

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2017
Երկ Երե Չոր Հնգ Ուրբ Շաբ Կիր
« Հուն   Օգո »
 12
3456789
10111213141516
17181920212223
24252627282930
31