Երեկ ազգային վիճակագրական ծառայությունը հրապարակել է տնտեսական ակտիվության ցուցանիշը (ՏԱՑ): Ըստ այդ տվյալների` այս տարվա հունվար-հունիսին ՏԱՑ-ն աճել է 6,1%-ով՝ նախորդ տարվա նույն ժամանակաշրջանի համեմատ: Ըստ ԱՎԾ-ի` արդյունաբերական արտադրանքի ծավալը 2017-ի հունվար-հունիսի ամիսներին աճել է 12,4%-ով, իսկ ծառայություններն, առանց առեւտրի, աճել են 10,9%-ով: Առեւտրաշրջանառությունն էլ աճել է 12,6%-ով:
Պաշտոնական տվյալներով` այս տարվա հունվար-հունիսին գյուղատնտեսությունն անկում է գրանցել 1,4%-ով է, իսկ շինարարության ոլորտում նշված ժամանակահատվածում 10%-ով անկում է գրանցվել:
Aravot.am-ի հետ զրույցում տնտեսագետ Վիլեն Խաչատրյանը կարծիք հայտնեց, որ տնտեսական ակտիվության 6,1% աճը որեւէ կերպ որակական ազդեցություն չի թողնում տնտեսության եւ քաղաքացու կյանքի վրա:
«Գյուղատնտեսության, այսպես ասած՝ «պիկ» սեզնոնին անկում է արձանագրվում, սա որոշակի բացասական ազդակի մասին է խոսում: Առեւտրաշրջանառությունը 12%-ով է աճել, բայց սրա ֆոնին սպառողական գների ինդեքսը 0,5 %-ով աճել է: Արդունաբերական արտադրանքի գների ինդեքսը 3%-ից մի քիչ ավելի աճ է գրանցել, ստացվում է՝ ոլորտ կա, կոնկրետ աճի ցուցանիշը տնտեսության վրա ազդող աճի է նմանվում: Արդյունաբերության ոլորտում, եւ գներն են աճել, եւ արդյունաբերական արտադրանքը, ինչը առեւտրի ոլորտի մասին չենք կարող ասել: Առեւտրաշրջանառության ծավալի աճը գուցե կարողացել են ֆիքսել հարկային քաղաքականության միջոցով: Բայց ինչ վերաբերում է ամբողջ տնտեսության աճին, ապա չենք կարող ասել, որ արդյունաբերությունն աճեց եւ ուղեկցվեց շինարարության եւ գյուղատնտեսության աճով: Սա արդեն փաստում է այն մասին, որ կա անհամաչափություն տնտեսության մեջ, եւ տնտեսության վիճակն այնքան լավ չէ, որքան թվերի միջոցով է երեւում»,-ասաց տնտեսագետը:
Անդրադառնալով կառավարության 2017-2022 ծրագրով նախատեսված տարեկան 5 % տնտեսական աճին, Խաչատրյանը թերահավատորեն է մոտենում այդ ցուցանիշին: Տնտեսագետն ասաց, որ գուցե ՏԱՑ-ի այս 6,1%-ը դրական տրամադրվածություն է տալիս, սակայն նախանշած աճը դժվար թե հասանելի լինի. «Որովհետեւ այդ աճի մեջ ավելանում է արտահանման տեսակարար կշիռը, իսկ արտահանման մեջ հանքահումքային ոլորտն է, որը միայն 0,5%-ն է տնտեսական աճի մեջ: Սա այն աճը չէ, որ մենք գիտատար տնտեսություն ենք սկսել զարգացնել: Ընդամենը հումքային բազայի վրա հիմնված տնետսություն է, այսինքն՝ սկսել է հումք շատ արտահանել: Սա վարչապետի ասած՝ «Խելացի Հայաստանի» արդյունքը չէ, այս պահին»:
Տնտեսագետը, ներկայացնելով որոշ ցուցանիշներ, նշեց՝ արտահանման կառուցվածքի մեջ պատրաստի սնունդի արտադրանքի արտահանումն աճել է 50 մլն դոլարով, սա ՀՆԱ-ի 0,5% է. «Սրան էլ գումարած հանքահումքային արտադրանքը, ՀՆԱ-ի 1 % է: Այս 2 ցուցանիշը բավական է, որ պնդեմ՝ որակական աճ չկա, եւ իրենց նշած ցուցանիշին չեն հասնելու: Եթե ուսանողների, բնակչության թիվը նվազել է, որոնք ՀՆԱ ստեղծող են, բա ո՞վ է ստեղծել այդ ՀՆԱ-ն: Անգամ պետական աշխատողների աշխատավարձերի բաշխման ծավալն է նվազել: Եթե անգամ աճ կա, բայց մեր կյանքի որակը չի փոխվում»:
Նելլի ԲԱԲԱՅԱՆ
