Ինչպես տեղեկանում ենք Արտակարգ իրավիճակների նախարարության կայքից, Շիրակի մարզի Կառնուտի ջրամբարում ջրահեղձ է եղել 1981 թ. ծնված Կ. Գ.-ն, որի դին ջրամբարից դուրս է բերվել քիչ առաջ, ժամը 14․20-ին՝ հատուկ ջրափրկարարական ջոկատի օգնությամբ։
Ըստ պաշտոնական հաղորդագրության, ահազանգը հնչել է գիշերը․ «Հուլիսի 24-ին, ժամը 00:17-ին տեղեկություն է ստացվել, որ 1981 թ. ծնված Կ. Գ.-ը մեկնել է Շիրակի մարզի Կառնուտի ջրամբար և չի վերադարձել, կասկածվում է, որ նա ջրահեղձվել է. անհրաժեշտ է փրկարարների օգնությունը:
Դեպքի վայր են մեկնել մեկ մարտական հաշվարկ և մարզային ճգնաժամային կառավարման կենտրոնի օպերատիվ խումբը:
Պարզվել է, որ Կառնուտի ջրամբարի արևմտյան հատվածում գտնվող արհեստական լճի (մոտ 5 մ խորությամբ, մոտ 70 մ երկարությամբ և 25 մ լայնությամբ) ափին հայտնաբերվել է Կ. Գ.-ի հագուստը»:
Մենք ճշտեցինք, որ վերջինս Կառնուտ գյուղի բնակիչ է, մութն ընկել է, սակայն տուն չի վերադարձել, հեռախոսազանգերին չի պատասխանել, տնեցիները իրար են խառնվել։ Որդին սկսել է փնտրել հորը ու ջրամբարի մոտ հայտնաբերել է նրա հագուստը։ Ընտանիքի անդամներն ահազանգել փրկարարներին։
Նշենք, որ Կառնուտի ջրամբարը թեև վտանգավոր է լողանալու համար, սակայն մարդիկ այստեղ երբեմն զբաղվում են ձկնորսությամբ։
Շիրակի մարզի դատախազ Կարեն Գաբրիլյանը փոխանցեց, որ կնշանակվի դատաբժշկական փորձաքննություն, որի արդյունքում կպարզվի մահվան պատճառը։
Նունե ԱՐԵՎՇԱՏՅԱՆ
