«Ինքը մշտապես բարձրաձայնել է՝ կվառեմ, կվերացնեմ, չեմ թողնի, որ երեխեն երկու տարեկանը գլորի: Ոչ ինձ, ոչ քեզ, թող տանեն մանկատուն»,- Aravot.am-ին պատմեց նախկին ամուսնու կողմից կացնահարված Թագուհի Մանսուրյանը:
Ըստ նրա՝ իր նախկին ամուսինը՝ Վլադիկ Մարտիրոսյանը, երբեւիցե ոչինչ իրենց երեխայի համար չի արել. «Ես դատարանում էլ այսօր հայտարարեցի, որ որպես հայր, ինքը պետք է աշխատեր, բերեր, երեխային պահեր,բայց ես եմ աշխատել, երեխային պահել: Ինքը գալիս էր, միանգամից հարձակվում վրաս, հարվածում ու փախչում, երբեւէ չէր հարցնում՝ երեխան ինչպես է, ինչով է ապրում, ինչ է հագնում ու ուտում»:
Հիշեցնենք, որ այսօր Շենգավիթ վարչական շրջանների ընդհանուր իրավասության դատարանում շարունակվեց նախկին ամուսնու նկատմամբ բռնություններ կատարելու մեջ մեղադրվող Թագուհի Մանսուրյանի գործով դատաքննությունը:
Հիշեցնենք նաեւ, որ անցյալ տարի հուլիսի 8-ին Երեւանի Սողոմոն Տարոնցի նրբանցքի 7-րդ շենքի շքամուտքի աստիճանների վրա տեղի ունեցած վիճաբանության ժամանակ Վլադիկ Մարտիրոսյանը կացնով բազմաթիվ հարվածներ էր հասցրել զոքանչին՝ Կարինե Մանսուրյանին, կնոջը՝ Թագուհի Մանսուրյանին, եւ աներոջը՝ Վաչագան Մանսուրյանին: Արդյունքում 64-ամյա Կարինե Մանսուրյանը մահացել էր, իսկ հայր ու դուստր մարմնական ծանր վնասվածքներով տեղափոխվել էին հիվանդանոց:
Թագուհի Մասնուրյանն անդրադառնալով ամուսնու պնդումներին, թե ինքը նրան հարվածել ու քերծել է, ասաց. «Մի անգամ, երբ գործից վերադառնում էի տուն, ձեռքիս պայուսակներ կային, ինձ չէի կարող պաշտպանել, մայրս պաշտպանեց ինձ ու քար շպրտեց նրա վրա, քարը կպավ այտին: Մենք դրա մասին բարձրաձայնել ենք, զանգել ենք ոստիկանություն, ասել, որ նա եկել է մեզ մոտ, մենք նրան քարով խփել ենք: Բայց ինչ վերաբերում է ճանկռելուն, քերծելուն՝ իմ եղունգներն արհեստական են, դրանք չեն ճանկռում: Ինքն ընդունակ է, որ իրեն ճանկռի ու ասի, թե ուրիշներն են արել: Այն ժամանակ էլ, երբ մայրս քարով խփել էր, ու քարը միայն այտին էր կպել, ինքը նկարներ էր բերել ու ասում, թե պարանոցն է վնասվել, մարմնի այլ հատվածներ»:
Արփինե ՍԻՄՈՆՅԱՆ
