Նախկին ամուսնու կողմից կացնահարված Թագուհի Մանսուրյանի պաշտպան Անժելա Հոբոսյանը չի բացառում, որ իր պաշտպանյալի նախկին ամուսինը ինքնավնասվել է ու իր կատարած վնասվածքները «բարդում է» նախկին կնոջ վրա:
Հիշեցնենք, որ այսօր Շենգավիթ վարչական շրջանի ընդհանուր իրավասության դատարանում շարունակվեց Մանսուրյանի նկատմամբ հարուցված քրեական գործի քննությունը, ըստ որի, Մանսուրյանը մեղադրվում է նախկին ամուսնուն՝ Վլադիկ Մարտիրոսյանի նկատմամբ բռնություններ կատարելու՝ նրան ճանկռելու համար:
«Վլադիկ Մարտիրոսյանից ամեն ինչ էլ կարելի է սպասել: Եթե մի մարդ օրեր շարունակ դարանակալում է, որ հարձակվի Թագուհի Մանսուրյանի վրա, աղմուկ-աղաղակ լինի, այդ մարդկանց ահուդողի մեջ է պահում, բնականաբար, նա կարող էր նաեւ նման բան անել, ինչու չէ որ, չէ՞ր կարող ինքնավնասվել:
Կամ, եթե նույնիսկ նրա վրա ինչ-որ հետք լիներ, բայց չէ որ Թագուհու վրա հարձակվում է, մայրն էլ տեսնում է, որ իր աղջկա վրա հարձակվել են, չէ՞ր կարող մայրն իր չալիկով կամ հայրն իր ձեռքով խփեր դրան, աղջկան փրկեր դրա ճիրաններից, բա ինչ անեին, թողնեին իրենց աղջկան խփի՞, սպանի՞: Մանսուրյանների անվտանգությունը չեն ապահովել»,- նման կարծիք հայտնեց Մանսուրյանի հանրային պաշտպան Անժելա Հոբոսյանը:
Արփինե ՍԻՄՈՆՅԱՆ
