Կենտրոն եւ Նորք- Մարաշ վարչական շրջանների ընդհանուր իրավասության դատարանը հեռացավ խորհրդակցական սենյակ՝ շորթում կատարելու մեջ մեղադրվող Անի Հովհաննիսյանի նկատմամբ վճիռ կայացնելու համար:
Դատարանը վճիռը կհրապարակի այսօր՝ առաջիկա րոպեներին:
Հիշեցնենք, որ Անի Հովհաննիսյանին մեղադրանք է առաջադրվել այն բանի համար, որ նա, հանդիսանալով լրատվական կայքի տնօրեն, շորթում կատարելու ուղղակի դիտավորությամբ լրատվական կայքի գովազդի գծով պատասխանատու Ինգա Կիրակոսյանին օգտագործելու միջոցով, որն հանցանքը կատարել է անզգուշությամբ, կատարել է խոշոր չափերով շորթում` «ՎՏԲ Հայաստան բանկ» ՓԲ ընկերության օրինական շահերին էական վնաս պատճառող տեղեկություններ հրապարակելով և նման տեղեկություններ հրապարակելու սպառնալիքով հիշյալ ընկերությունից 15.03.2016թ. պահանջել է խոշոր չափի` 1.000.000 ՀՀ դրամ գումար:
Անի Հովհաննիսյանն այսօր իր վերջին խոսքում պնդեց, որ իրեն մեղավոր չի համարում ու իր նկատմամբ առաջադրված է շինծու մեղադրանք:
Նրա պաշտպան՝ փաստաբան Լիպարիտ Սիմոնյանն էլ պաշտպանական ճառում վերլուծեց առաջադրված մեղադրանքի հանցակազմը՝ պնդելով, որ ապացույցներ չկան, որ Անի Հովհաննիսյանը կատարել է իրեն մեղսագրվող շորթումը:
Արփինե ՍԻՄՈՆՅԱՆ
