Կենտրոն եւ Նորք-Մարաշ վարչական շրջանների ընդհանուր իրավասության դատարանն այսօր մեղավոր ճանաչեց «Անալիտիկ» կայքի խմբագրին՝ ԱԺ պատգամավոր Տիգրան Ուրիխանյանից շորթում կատարելու դեպքով, բայց անմեղ ճանաչեց «ՎՏԲ բանկից» շորթում կատարելու դեպքով:
Հիշեցնենք, որ Անի Հովհաննիսյանին մեղադրանք էր առաջադրվել շորթում կատարելու ուղղակի դիտավորությամբ լրատվական կայքի գովազդի գծով պատասխանատու Ինգա Կիրակոսյանին օգտագործելու միջոցով «ՎՏԲ Հայաստան բանկ» ՓԲ ընկերությունից խոշոր չափերով շորթում կատարելու մեջ:
Ըստ մեղադրանքի՝ «ՎՏԲ Հայաստան բանկ» ՓԲ ընկերության օրինական շահերին էական վնաս պատճառող տեղեկություններ հրապարակելով և նման տեղեկություններ հրապարակելու սպառնալիքով հիշյալ ընկերությունից 15.03.2016թ. պահանջել է խոշոր չափի` 1.000.000 ՀՀ դրամ գումար:
Դատական նիստից հետո Անի Հովհաննիսյանի պաշտպան՝ փաստաբան Լիպարիտ Սիմոնյանն ասաց. «Գտնում եմ՝ Տիգրան Ուրիխանյանի դրվագով նույնպես պետք է արդարացման վճիռ կայացվեր: Միանշանակ բողոքարկելուն ենք, քննարկման ենթակա չէ»:
Հարցին, թե Տիգրան Ուրիխանյանի դեպքով դատարանի վճռի առումով տեսնո՞ւմ է պատգամավորի գործոնը, փաստաբանը պատասխանեց. «Ոնց որ իրենք էին նշում, իրենք գործիք են եղել, գուցե իրենց որպես գործիք օգտագործող անձանց գործոնը կար, չեմ կարող հստակ ասել»:
Արփինե ՍԻՄՈՆՅԱՆ
