Շենգավիթ վարչական շրջանի ընդհանուր իրավասության դատարանում այսօր «Սեֆիլյանի եւ մյուսների գործով» դատական նիստից հետո «Հիմնադիր խորհրդարան» ընդդիմադիր շարժման անդամ Ալեք Ենիգոմշյանն անդրադարձավ լրագրողների հարցին, թե իր դիտարկմամբ՝ ինչո՞ւ հանրությունը չարձագանքեց Ժիրայր Սեֆիլյանի վերջին կոչին, այն է՝ շրջափակել Ավան եւ Նոր Նորք վարչական շրջանների ընդհանուր իրավասության դատարանի շենքը եւ ոստիկանությանը ստիպել ազատ արձակել «Սասնա ծռերին»:
«Ամեն ինչ հնարավոր է, եւ ամեն ինչ ունի իր ժամանակը: Դա չի նշանակում, որ դա հենց հաջորդ նիստի ժամանակ պետք է լինի: Դա չի նշանակում, թե կոչը իրատեսական չէ, տեսնենք…Ամեն պայքար խմորվելու եւ մշակվելու կարիք ունի»,-պատասխանեց Ալեք Ենիգոմշյանը: Հետաքրքրվեցինք, թե ի՞նչ ձեւաչափի պայքարի մասին է խոսքը:
«Քաղաքացիական ակտիվ ճնշման մասին է խոսքը: Դա նշանակում է ժողովրդի ճնշմամբ հասնել արդյունքի: Խաղաղ, բայց վճռական պայքարի մասին է խոսքը»,-նշեց Ալեք Ենիգոմշյանը:
Մանրամասն ՝ տեսանյութում:
Լուիզա ՍՈՒՔԻԱՍՅԱՆ
