Հայաստանի իշխանությունները չեն կարողացել ապահովել լիարժեք հաշվետվողականություն անցյալ տարի լրագրողների և հիմնականում խաղաղ ցուցարարների դեմ ոստիկանության բռնությունների վերաբերյալ: Միևնույն ժամանակ մեղադրանք է առաջադրվել առնվազն 32 ցուցարարի նկատմամբ, նրանից 21-ը մեղավոր են ճանաչվել, 11-ը ազատազրկման դատապարտվել: Այս մասին ասվում է Human Rights Watch իրավապաշտպան կազմակերպության զեկույցում:
Հիշեցնենք, 2016 թվականի հուլիսի 29-ի երեկոյան Էրեբունու ՊՊԾ գնդի գրավումից հետո ցուցարարները Սարի Թաղում և Խորենացի փողոցում բախվեցին ոստիկանների ու նրանց թիկունքից գործող քաղաքացիական հագուստով անձանց հետ:
Ոստիկանությունը կամայականորեն բերման է ենթարկել հարյուրավոր ցուցարարների, ծեծի ենթարկել նրանց, որոշ դեպքերում՝ դաժանորեն: Որոշ դեպքերում ոստիկանությունը թույլ չի տվել ձերբակալվածներին պատշաճ բժշկական օգնություն ստանալ, ասվում է զեկույցում:
«Երևանի հուլիսյան ցույցերից մեկ տարի անց ոստիկանության բռնությունների զոհերը դեռ սպասում են արդարության և հաշվետվողականության,- ասել է Human Rights Watch-ի Հարավային Կովկասի տնօրեն Գիորգի Գոգիան:- Հանրության վստահությունը ոստիկանության և արդարադատության համակարգի նկատմամբ խաթարված է, և դա վերականգնելու համար հաշվետվողականությունը չափազանց կարևոր է»:
Պատրաստեց՝ Վիկտորյա ԱՆԴՐԵԱՍՅԱՆԸ
