Շիրակի դատախազը՝ Հովսեփ Սիմոնյանի ու նրա օգնականի կողմից կաշառք պահանջելու փաստով հարուցված քրգործի մասին (Տեսանյութ)

Ինչպես անդրադարձել էինք, Գյումրու թիվ 38 դպրոցի նախկին տնօրեն Գոհար Շահբազյանը դիմում էր հասցեագրել Շիրակի մարզի դատախազություն, որ իրենից կոնկրետ գումարի չափով կաշառք են պահանջել նույն դպրոցի տնօրենի պաշտոնում վերանշանակելու համար։

Շիրակի մարզի դատախազ Կարեն Գաբրիելյանն էլ Aravot.am-ին տեղեկացրել էր, որ քրեական գործ է հարուցվել՝ ՀՀ Քրեական օրենսգրքի 311 հոդված 4-րդ մասի հատկանիշներով։

Ըստ shamshyan.com-ի, Գոհարիկ Շահբազյանը Շիրակի մարզպետ Հովսեփ Սիմոնյանին հանդիպելու նպատակով դիմել է մարզպետի օգնական Արմեն Պետրոսյանին։ «Ըստ դիմումատուի՝ Ա․ Պետրոսյանը խոստացել է, որ կդասավորի, որպեսզի ինքը հանդիպի մարզպետին, իսկ տնօրենի պաշտոնում վերականգնվելու դիմաց պահանջել է 6 միլիոն դրամ»։

Հովսեփ Սիմոնյանն էլ իր հերթին Aravot.am-ի միջոցով Գոհար Շահբազյանին կոչ էր արել չափի մեջ մնալ ու չզրպարտել իրեն ու իր օգնականին, այլապես վաղը մյուս օր զրպարտելու համար կգնա, կնստի։

Այսօր Շիրակի դատախազ Կարեն Գաբրիելյանը իր հաշվետու մամուլի ասուլիսի ժամանակ տեղեկացրեց, որ քրեական գործը կարճվել է՝ հանցագործության հատկանիշների բացակայության հանգամանքով։

Մանրամասները՝ տեսանյութում

Նունե ԱՐԵՎՇԱՏՅԱՆ