Տուն նվիրեցին Շիրակի համալսարանի մագիստրոսների դիպլոմները հանձնելու ժամանակ (Տեսանյութ, ֆոտոշարք)

Շիրակի պետական համալսարանի բակում այսօր մեծ հանդիսավորությամբ, Շիրակի մարզի բարձրաստիճան պաշտոնյաների մասնակցությամբ հանձնվեցին մագիստրատուրայի շրջանավարտների դիպլոմները։

Նշենք, որ այս տարի բուհն ուներ մագիստրատուրայի 101 շրջանավարտ, ընդ որում նրանք Շիրակի պետական համալսարանի առաջին մագիստրոսներն են․ բուհը այս ուսումնական տարում փոխեց իր կարգավիճակը՝ Գյումրու Միքայել Նալբանդյանի անվան պետական ինստիտուտից վերածվելով Շիրակի Միքայել Նալբանդյանի անվան պետական համալսարանի։

Պաշտոնյաներից յուրաքանչյուրը՝ Շիրակի հոգևոր առաջնորդ Միքայել եպիսկոպոս Աջապահյանը, Շիրակի մարզպետ Արթուր Խաչատրյանը, Գյումրու քաղաքապետ Սամվել Բալասանյանը, ԱԺ պատգամավոր Ֆելիքս Ցոլակյանը, որը նաև բուհի կառավարման խորհրդի նախագահն է, իրենց բարեմաղթանքը հղեցին շրջանավարտներին։

Շիրակի նախկին մարզպետ, բուհի կառավարման խորհրդի նախագահ, գեներալ Ֆելիքս Ցոլակյանը նշեց, որ համաձայն չէ հնչող այն կարծիքների հետ, թե չկան աշխատատեղեր։ «Լավ մասնագետը միշտ աշխատանքի տեղ ունի, իսկ լավ մասնագետ դառնալու համար միայն ավարտելը չէ, այլ սովորելն ավարտելուց հետո»,-շեշտեց նա։

Շիրակի պետական համալսարանի ռեկտոր Սահակ Մինասյանն էլ կարմիր դիպլոմները հանձնելիս ասաց․ «Դիպլոմը՝ որպես ատեստավորման վերջնարդյունք իր նոր տեսակով, դեռևս օբյեկտիվության չհասնող գնահատման գործիք է։ Արժևորումը, արժեհամակարգի գնահատումը շատ հաճախ, պատվախնդրորեն ասենք, որ իրականացվում է դիրքերում, առաջին գծում, աստղաբույլերի օրինաչափություններն ուսումնասիրող լաբորատորիաներում, երկնային կյանքը երկրայինով իմաստավորող Աստվածաբանական խմբերում, ռազմական արվեստում։ Տարբեր ազգեր ու ժողովուրդներ տարածությունն ու ժամանակը զգում են տարբեր կերպ։Մենք խաչ ունենք տանելու, մենք պարտավոր ենք գնահատել ժամանակի ամեն մի վայրկյանը ու տարածության ամեն մի սանտիմետրը՝ հանձինս մեր սուրբ, ավանդաբար ժառանգություն ստացած մայր հողի»։

Ռեկտորը հիշեցրեց, որ նրանք Շիրակի պետական համալսարանի մագիստրոսներն են և իրավունք չունեն պատվով չկրելու բուհի ժառանգությունը։

Նշենք, որ իրադարձության ժամանակ սոցիալական բնակարանի բանալիներ հանձնվեցին անօթևան մի ընտանիքի, որի երկու դուստրերը սովորում են բուհում։ Առանձնատունը ձեռք է բերվել բուհի պրոֆեսոդասախոսական կազմի, շրջանավարտ-ուսանողների նվիրատվությամբ ու « Գյումրին առանց տնակների» հիմնադրամի ներդրումներով։

Առանձնատունը քաղաքի կենտրոնում է, այն անօթևան ընտանիքին հանձնվեց այսօր։

Այս մասին քիչ անց։

Նունե ԱՐԵՎՇԱՏՅԱՆ