«Բա մեր մայրենի լեզվին ինչ ստատուս տանք». Խաչիկ Մանուկյան

Բանաստեղծ Խաչիկ Մանուկյանը մտահոգված է՝ Հայաստանում ռուսերենը պաշտոնական լեզու դարձնելու Մոսկվայի առաջարկից:

«Ծիծաղելի կարող է թվալ… բա մեր մայրենի լեզվին ինչ ստատուս տանք: Մեր ինքիշխանության ամենամեծ գրավականը մեր լեզուն է»,- այսօր «Բլից ինֆո» ակումբում ասաց պարոն Մանուկյանը:

Նրա խոսքով, ընդամենը ռուսերենը Հայաստանում պետական լեզու դարձնելու առաջարկ է եղել, ոչ մի պարտադրանք, բայց պետք է քննադատություններով սանձել, որ հաջորդ անգամ չփորձեն նման հարցով մեզ դիմել. «Մեր պետական, մայրենի լեզուն հայերենն է»:

Գրականագետ Արմեն Ավանեսյանն էլ նկատեց, թե պատահական չէ, որ Մոսկվայի առաջարկը բուռն արձագանք գտավ Հայաստանում. «Դեռեւս ցարական կառավարության ժամանակ եղավ ռուսերենը պարտադրելու փորձ, կայսերական մտածողություն է, կայսերական քաղաքականություն է, բայց մենք մեր ինքնությունը պահպանել ենք մեր մշակույթի ու լեզվի միջոցով: Այդ իմաստով ինչքան էլ այնտեղից փորձեր արվեն, մենք ամուր ենք մնալու մեր լեռների պես»:

Արփինե ՍԻՄՈՆՅԱՆ