Տավուշի մարզխորհրդի վերջին՝ հուլիսի 27-ին կայացած նիստի ժամանակ Իջեւանի տարածաշրջանի Ներքին Ծաղկավան համայնքի ղեկավար Նաիրի Աթաբեկյանը հայտարարեց, որ սահմանամերձ գյուղեր Ներքին Ծաղկավանը, Սեւքարը եւ Սարիգյուղը զրկված են ոռոգման ջրից:
Նշենք, որ խորհրդային տարիներին այդ գյուղերը պոմպերի միջոցով ոռոգման ջուր էին ստանում 1980թ. շահագործման հանձնված Ջողազի ջրամբարից: Սարիգյուղը, Սեւքարը, Ներքին Ծաղկավանը Ջողազի ջրամբարին մոտ են գտնվում: Ջողազի ջրամբարից ոռոգման ջուր չի ստանում նաեւ 45 միլիոն խորանարդ մետր տարողությամբ ջրամբարի աջ ափին գտնվող Բերքաբեր գյուղը:
Բերքաբերի դեմ-դիմաց, արհեստական լճի ձախ ափին է գտնվում Ադրբեջանի Ղազախի շրջանի Մազամ գյուղը: Ջրամբարի այդ ափին ադրբեջանցիները խողովակներ են դրել ջրամբարի մեջ եւ ոռոգման նպատակով ջուր են մղում: Բերքաբերի գյուղապետ Արթուր Մադաթյանը մեզ հայտնել է, որ Մազամի ադրբեջանցիները Ջողազի ջրով ոռոգում են ոչ միայն իրենց տնամերձ հողամասերը, այլ նաեւ՝ Բերքաբերին պատկանող, 1991 թվականից փաստացի սահման հանդիսացող ջրամբարի ձախ ափին գտնվող, ադրբեջանցիների վերահսկողության տակ գտնվող 860 հեկտար հողերը:
Ջողազի ջրամբար են լցվում Ոսկեպար գետի եւ Աճարկուտ ու Կիրանց գյուղերի տարածքով հոսող Քարահատ գետի ջրերը: Մեր սարերի ջրերով ադրբեջանցիները ոռոգում են կատարում, իսկ Տավուշի մարզի սահմանամերձ գյուղերի հողերը չեն ոռոգվում:
Ոսկան ՍԱՐԳՍՅԱՆ