Ալեք Ենիգոմշյանը «Հաց բերողի» հուշարձանը տեղադրելու մասին. «Եթե թույլ չտան՝ դա ցույց կտա նրանց տմարդի լինելը» (Տեսանյութ)

Այսօր «Հաց բերողի»՝ Արթուր Սարգսյանի ծննդյան օր է, նրա հիշատակին այսօր նրա համախոհները շիրիմին մոմավառություն էին կազմակերպել:

Մինչ մոմավառությունը, Aravot.am-ի հետ զրույցում Ալեք Ենիգոմշյանն ասաց. «Այսօր  արժանապատվություն խորհրդանշող Արթուր Սարգսյանի ծննդյան օրն է: Մեկ տարի առաջ բոլորս ճանաչեցինք Արթուր Սարգսյան հայ մարդուն, եւ իր ցավալի, ֆիզիկական կյանքի ավարտից հետո սա նրա առաջին ծննդյան օրն է, ուստի մեր հոգեւոր, բարոյական եւ խղճի պարտքն է այսօր հարգել իր հիշատակը, փառք տալ, որ Արթուր Սարգսյանի նման մարդ է ծնվել:  Բնական է, որ Արթուր Սարգսյանին սիրողները պետք է հավաքվեին իր շիրմի շուրջ եւ մոմավառությամբ հիշեին. սա նվազագույնն է, որ մենք այսօր կարող էինք անել ոչ թե Արթուրի, այլ ապրողների համար, որպեսզի ապրողները վարակվեին Արթուրի բարոյականությամբ»:

Մանրամասներն՝ տեսանյութում

Մեր այն հարցին՝ ֆեյսբուք սոցիալական ցանցում քննարկվում է, որ Արթուր Սարգսյանը չի մասնակցել արցախյան ազատամարտին, եւ սուտ է այն տեղեկությունը, որ նա վիրավորվել է ազատամարտի ժամանակ հաց տանելիս, նա վիրավորվել է սովետական բանակում ծառայելու ընթացքում, Ենիգոմշյանը պատասխանեց. «Մենք գիտենք, թե ինչքան ֆեյքերի հեղեղ կա սոցիալական ցանցերում: Ես չեմ էլ ուզում ասել, որ ամոթ այն մարդկանց, ովքեր նման բաներ են գրում: Մեր հայ ժողովրդի պատմության ընթացքում իսկական հեղինակությունների պատկերը մտորելու այնքան փորձեր են եղել տարբեր ժամանակներում, բայց այդ բոլորը հիմարություններ են: Պատմությունն ամեն ինչ իր տեղը դնում է: Արթուր Սարգսյանն իր կերպարով մեր պատմության մեջ մնալու խնդիր չունի»:

Ենիգոմշյանը վստահեցրեց, որ Արթուր Սարգսյանն իսկապես մասնակցել է արցախյան ազատամարտին. «Նա բացի մասնակցելուց, մեծ դերակատարություն է ունեցել ազատամարտիկներին եւ սնունդով եւ այլ կարիքները հոգալու, օժանդակություն ցույց տալու գործում, վիրավորվել է, վնասվել է»:

Մանրամասներն՝ տեսանյութում

Արթուր Սարգսյանին նվիրված հուշարձանի մասին էլ Ենիգոմշյանն ասաց, որ առաջիկայում դրա մասին մանրամասները կասեն: Իսկ թե իշխանությունները թույլ կտա՞ն տեղադրել այդ հուշարձանը, մեր այս հարցին ի պատասխան պարոն Ենիգոմշյանն ասաց.

«Եթե թույլ չեն տա, դա ցույց կտա նրանց տմարդի լինելը: Ես կասկածում եմ, որ թույլ կտան: Բայց կուզենամ հաճելի անակնակալ զգալ, որ նրանք արգելք չհանդիսանան: Արթուր Սարգսյանի նկատմամբ ժողովրդի հարգանքի տուրքը կա, ու մնալու է»:

Նելլի ԲԱԲԱՅԱՆ