Բասկետբոլի 2019 թ. աշխարհի առաջնության ընտրական փուլում Հայաստանի հավաքականը պատասխան խաղում մրցակցի հարկի տակ 92:78 հաշվով առավելության հասավ Սլովակիայի ընտրանու նկատմամբ:
Ինչպես տեղեկացնում է Հայաստանի բասկետբոլի ֆեդերացիայի կայքը, այս հաղթանակից հետո Հայաստանի հավաքականը յոթ միավորով ստանձնեց «A» խմբի միանձնյա առաջատարի դերը:
Մեր թիմում վաստակած 22 միավորով հանդիպման ամենաարդյունավետ խաղացող ճանաչվեց Ռայան Բոաթրայթը:
Խմբի մյուս դիմակայությունում Բոսնիա եւ Հերցեգովինան սեփական հարկի տակ 72:88 հաշվով պարտվեց Շվեդիային:
Հայաստանի հավաքականը գլխավոր մարզիչ Նիկշա Բավցեւիչի ղեկավարությամբ մեկնում է Շվեդիա՝ հանդիպելու այդ երկրի ընտրանու հետ: Խաղը կկայանա օգոստոսի 16-ին, մրցակցի հարկի տակ:
Աշոտ ՀԱԿՈԲՅԱՆ
Լուսանկարը՝ ՀԲՖ-Ի
