ԱԺ պատգամավոր Սամվել Ալեքսանյանը խոստացել էր, որ շատ շուտով Մալաթիան դարձնելու է կենտրոն եւ Մալաթիա մուտքն էլ վիզայով է սարքելու: Սակայն Մալաթիա չմտած, հենց ամենակենտրոնական փողոցից՝ Սեբաստիայից արդեն տպավորություն է, որ գյուղ ես մտնում, ավելի ճիշտ՝ գոմ: Փողոցի կանգառներից մեկի անմիջապես հարեւանությամբ գառ են վաճառում՝ բնակելի տարածքում: Ամռան այս տապին ոչխարների հոտը տարածվում է ողջ շրջակայքում: Բնակիչներն ամաչում են այդ կանգառից երթուղային նստել, երթուղայինի դուռը բացում են՝ հոտից ուղեւորները պատուհանները փակում են: Մենք եղանք ոչխարների վաճառքի կետում, տարածքում, մեղմ ասած հակասանիտարական վիճակ էր՝ մի կողմում մորթված գառներից մեկի աղիներն էին թափված, ամենուրեք ճանճեր, արյուն, մյուս կողմում՝ քերթած մորթին:
Բնակիչները խնդրում են Սամվել Ալեքսանյանին կամ նրա բարեկամ, Մալաթիայի թաղապետ Արտակ Ալեքսանյանին փոխանցել՝ «Ալեքսանյան ջան, Մալաթիա մուտքը վիզայով սարքելուց առաջ էս ոչխարներից ազատվիր»:
Լուսանկարները՝
ՀՌԻՓՍԻՄԵ ՋԵԲԵՋՅԱՆԻ
«Առավոտ»
18.07.2017
