«Հայաստանի խաղողագործների միության» կանխատեսումներով՝ այս տարի խաղողի բերքը 30-35 տոկոսով պակաս կլինի նախորդ տարվանից, պատճառը՝ եղանակային անբարենպաստ պայմաններն են եւ խաղողագործների ֆինանսական խնդիրները: Այս մասին այսօր «Զարկերակ» մամուլի ակումբում լրագրողներին հայտնեց «Հայաստանի խաղողագործների միության» նախագահ Արտակ Սարգսյանը:
Նա նշեց, որ մոտ երեք շաբաթից ՀՀ-ում սկսվելու է խաղողի մթերումը. «Ըստ նոր սուբսիդավորման ծրագրի՝ պետությունը մթերող ձեռնարկություններին տարեկան երեք տոկոսով վարկային պորտֆել է տալու, որպեսզի վերջիններս գյուղացուն վճարելու խնդիրներ չունենան: Դա ողջունելի քայլ է, բայց ծրագիրը կրկնապատկելու-եռապատկելու կարիք կա, ինչն էլ խոստացվել է: Այսինքն, ծրագիրը կհասցվի 20 միլիարդ դրամի»:
Բանախոսի փոխանցմամբ՝ խաղող մթերող ընկերություններից «Վինար»-ը գյուղացիներին դեռ 30 միլիոն դրամի պարտք ունի, եւ խնդիրները միայն դրանով չեն սահմանափակվում. «Շատ խաղողագործներ պայմանագրեր չունեն վերամշակող արտադրամասերի հետ, բացի այդ՝ տարին սակավաջուր էր»:
Լուիզա ՍՈՒՔԻԱՍՅԱՆ
